Dahariana Evertsz di DVG:
ORANJESTAD (AAN): DuCaPHEN ta e abreviacion di Dutch Caribbean Public Health Expertise Network y ta un red di cooperacion entre e paisnan y entidadnan di salud publico den Caribe Hulandes y Reino Hulandes. Aruba e siman aki ta anfitrion di e conferencia anual di DuCaPHEN 2026, unda lidernan di salud publico, profesionalnan medico y colaboradornan di henter Caribe Hulandes y Reino Hulandes lo reuni. Organiza den cooperacion cu RIVM, e encuentro ta fortalece cooperacion regional, preparacion y resiliencia pa enfrenta retonan di salud publico den nos region.
Hoofd Gezondheidsbevordering di DVG, señora Dahariana Evertsz, den informacionnan cu el a duna na DIARIO, el a remarca cu durante e conferencia lo network hunto y papia riba diferente tema relevante na salud. E proposito ta tambe, segun el a menciona, pa colecta data pa haya informacionnan cu ta produci pa educa ciudadanonan pa nan desaroya habilidadnan pa comprende, uza y haya acceso na informacionnan di salud. Tambe ta pone enfasis riba reenforsa comunicacion y colaboracion.
Segun señora Evertsz tin hopi informacionnan robes eyfo. Meta di DVG ta pa streamline informacionnan durante e conferencia, pero tambe haci e parti di salud uno mas comprendibel pa tur ciudadano y educa nan cu e habilidad pa comprende informacion entre otro pa sa kico ta e puntonan importante cu nan mester pone atencion riba dje, con pa ricibi informacion y con nan mes por controla si e informacion ta corecto of no.
“Nos kier pa ciudadanonan sinti nan mes responsabel pa nan salud cu e hermentnan cu nos ta duna nan. Tambe pa nan haya informacionnan mas accesibel, sea tumando contacto via telefoon of via paginanan social di DVG. Importante ta cu pueblo mester sinti cu semper nan por tuma contacto cu nos pa haya informacion corecto pa nan por sinti nan mes mas comodo y safe mientras nan ta purba di crea balansa den nan salud”, señora Evertsz a conclui bisando.
