Gobierno Wever-Croes a presenta plan crucial pa futuro
*Kico cantidad di buelonan y barconan ta nifica pa clima?
*E pan di cada dia di e Arubiano y produccion di energia
ORANJESTAD(AAN)—Cosecha na cantidad di pais a wordo afecta pa secura. Na mes momento, hende a perde nan bida den desastrenan natural cu a presenta.
Na cuatro ocasion na 2022, sistemanan tropical a pasa den vecindario di Aruba y a bira horcan destructor y asina a duna prueba cu algo a cambia.
Na 2020, Aruba mester a bati alarma pa motibo cu e mester a cera su fuente di entrada cu ta turismo y sin yudansa di Hulanda, Aruba lo tabata uno di e hopi paisnan chikito, cu ni sikiera a wordo menciona ora tabata sigui e rastro devastador di Covid-19.
Na e momento por a mira con vulnerabel un pais chikito y sigur un isla chikito ta, enfrente desastrenan natural.
Mientras mundo ta alcansa final di 2022, mas y mas ta wordo papia di decisionnan grandi cu rond mundo ta wordo tuma relaciona cu e cambio di clima.
Gobiernonan mester adapta produccion di cuminda y bolbe na sistemanan cu no ta afecta clima pero tambe mishi cu cu loke semper tabata fuente di alimento di hende, manera carni, pisca, trigo produci cu machinenan awor considera peligroso pa clima.
Kico Aruba mester spera?
Durante ultimo lunanan por a tuma nota, di pasonan cu ta wordo tuma den produccion di awa y coriente na Aruba, cu ta dos fuente conoci pa e efecto cu nan tin riba medio ambiente y na cual DIARIO den proximo etapa di informacion, lo bay dedica mas atencion.
Den futuro, medidanan mas severo mester wordo tuma, pero ta esencial pa Pueblo tambe comprende kico ta na wega y con mester enfrenta loke ta bini.
E momento ta yega pa cuminsa papia di e contribucion di un buelo na menasa pa clima.
Kico motor di un avion ta nifica pa clima? Cuanto problema un barco ta representa pa e clima di cual nos salud ta depende?
Aruba ta un pais cu ta depende di su turismo basa riba e concepto beach, solo y laman.
Tres palabra cu ta bini dilanti den frasenan cu ta papia di e hecho cu nivel di laman lo subi y causa asina destruccion na beachnan.
Kico lo pasa cu nos beachnan di santo blanco si laman sigui subi?
Aruba lo mester introduci metodonan moderno cu ta bay contra subida di nivel di laman?
Cu hopi satisfaccion nos a tuma nota cu Gobierno Wever-Croes lo tene un Conferencia di Clima na Aruba na 2023.
For di awor tur hende mester cuminsa proteha e patrimonio natural di Aruba. Mester bolbe na e costumbernan di e Arubiano, cu tabata cuida su naturalesa.
E Arubiano cu tabata recicla tur loke e por a bolbe pone na su uzo.
Recicla no solamente tabata cuida naturaleza pero tambe e cartera for di cual placa mester a sali pa cubri costo di bida.
Mundo ta bati alarma y Gobierno Wever-Croes ta prepara un Conferencia cu lo hiba e pais na un berdad.
Un alarma cu tambe ta invita Aruba pa bolbe na tradicionnan di Aruba, cu tabata cuida su naturaleza, cu tabata fuente di entrada y cuminda pa Aruba. Con mester bolbe na e sentido di responsabilidad pa Aruba, ta e contesta cu nos ta spera di e conferencia y pa cual nos lo prepara Aruba!
