For di su inicio DIARIO tabata pionero den cobertura di tempo
- DIARIO y Meteo a cumpli cu nan deber pa scapa bida y propiedad
- Meteorologia responsabel pa avion y e bienestar di cada hende
ORANJESTAD (AAN)- Scapa y defende bida ta e exigencia mas importante den periodismo, cu no ta un poder pa aplasta Pueblo, pero e poder di Pueblo den su lucha pa su bienestar.
Na momento cu DIARIO a mira luz, un base mester a wordo crea pa DIARIO por a cumpli cu tur e facetanan mas importante di periodismo internacional como prome matutino di Aruba na idioma di Aruba y completamente basa riba bienestar di Aruba.
Status Aparte tabata uno di e temanan pero tambe tur loke Status Aparte lo a aporta pa Aruba den un futuro nobo.
Historia y sigur temponan moderno cu ta trece imagen di rond mundo pa Aruba, ta duna prueba, cu condicionnan di tempo ta crucial pa bienestar di hende. Desastrenan natural ta e peor enemigo di hende. Un horcan den un minuut por haci loke ni un bom nuclear por haci pa un lugar specifico debi na su poder destructivo.
Pa DIARIO por atende cu su responsabilidad completo e mester por traha cu tur sector di e pais y den esaki sigur cu expertonan den Meteorologia, cu ta hunga un lugar central den bida economico, financiero y social di Aruba.
For di su inicio, DIARIO na forma profesional, cu asistencia directo di e Departamento di Meteorologia di Antia Hulandes na Curacao y Aruba, a presenta condicionnan di tempo na e Pueblo di Aruba.
Cu asistencia di e experto cu preparacion y aceptacion internacional, Arthur Dania, kende e tempo tabata dirigi Servicio di Meteorologia Antiano, DIARIO a ricibi e base necesario pa na forma profesional por atende cu informacionnan ricibi di Meteo, semper y cuando DIARIO ta respeta e conocemento experto di Meteo y ta tene su mes na informacionnan di e expertonan.
Ora Aruba a conoce su propio Departamento di Meteorologia cu personal bon prepara cu educacion constante y experencia enorme, DIARIO mas cu nunca mester a atende cu Meteorologia debi na cambio di clima, cu a duna un aspecto nobo na meteorologia.
Con importante e ciencia aki tabata, a bini dilanti cu entrega di e rapport di Cambio di Clima prepara pa Meteorologonan y cu a exigi ampliacion di conocemento di DIARIO tambe.
DIARIO a prepara Aruba debidamente pa e realidad, cu cambio di clima lo deshaci di reglanan cu tabata existi pa hende cu no por cambia decision di naturalesa.
Nos mester a prepara nos mes debidamente pa por informa Aruba di cambio di clima, cu resultado directo pa Aruba, cu por nota con e Oceano Atlantico mas cayente a bira e factor importante ora ta papia di temporada di horcan.
DIARIO nunca a pone fin na su advertencianan di cambio di clima, cu den fin di siman cu a pasa, a entrega un prueba.
E yobidanan di fin di siman, por a wordo spera y DIARIO a prepara Aruba pa e realidad, cu hasta National Hurricane Center a deshaci di su pronostico original y a aumenta su cantidad di sistemanan den temporada di horcan.
Siman pasa ainda DIARIO a mustra cu cualkier momento por a spera actividad den porta di Aruba, loke a pasa den fin di e siman aki cu un sistema mas cu no a desvia pero a yega porta di region di Caribe.
No tin lugar pa sensacion den asuntonan di clima y condicion di tempo, pasobra bida di hende ta depende directamente di periodismo serio pa presenta informacionnan di expertonan den Meteorologia pero tambe tur instancia oficial, cu ta encarga cu Desastre Natural, causante mayor di morto y destruccion.
Loke a pasa den fin di siman na Aruba, cu a registra yobida fuerte, no ta sorpresa pero situacionnan cu tabata parti di pronostico profesional pa e dianan aki, cu na forma profesional pa periodismo prepara pa sirbi Pueblo den e materia aki tambe, a wordo presenta na Aruba.
Scapa bida ta keda central den e mundo di Meteorologia y di periodismo, cu ta sirbi economia tambe. Como isla cu economia como su fuente di entrada, informacionnan di Meteo ta sumamente valioso pa e piloto cu ta baha avionnan, barconan di carga cu ta trece mercancia pa e hendenan cu ta biba of ta bishita Aruba.
Wega no por wordo haci cu situacionnan di tempo, cu ta exigi mas cu nunca profesionalismo riba tur tereno den clima, cu ta e factor decisivo pa bida y bienestar di bida humano y di tur comunidad.
