Agresion den Parlamento den pasado ta haya un rabo pa eleccion 2024
- Cambio di Ley ta cera porta Conseho di Ministro te 2026 pa Marisol
- Votadornan Marisol lo no mira nan candidato den stul di Ministro awor
ORANJESTAD (AAN) Cu 2024 sigur ta bira un aña di basta noticia cu lo drenta historia sin cu esaki tabata riba e agenda originalmente, ta un hecho.
Mientras votadornan di Aruba ta prepara pa nan acudi na urna electoral, DIARIO ayera a ricibi informacionnan cu ta confirma cu despues di eleccion, hasta si su partido haya suficiente voto, Marisol Lopez Tromp lo no por bira Ministro pa su partido MAS na 2024.
E motibo cu te na 2026 Aruba por papia atrobe di un posibel Ministro Marisol Lopez Tromp, ta relciona cu e hecho cu na Maarrt 2018, Marisol a wordo condena pa medio di leynan penal, pasobra el a wordo declara culpabel di a practica mentira contra Chris Dammers, cu tabata Miembro di Parlamento.
Un situacion historico a surgi pa partido AVP, cu un incidente basta bochornoso den Parlamento di Aruba caminda Marisol Lopez Tromp, a acusa Dammers di a dal su persona.
Sala di reunion e tempo a bira centro di basta confusion sigur pa AVP, ya cu na prome instancia Dammers a wordo acusa di a dal Marisol Lopez-Tromp, cu e tempo tabata forma parti di AVP.
Sala di Parlamento a conoce basta tension y hasta tabata tin miembronan di AVP cu a wordo acusa di a mira kico a pasa den Parlamento pero no a bay contra Marisol Lopez Tromp, cu a acusa Dammers sin motibo.
E caso a bira pio ora a resulta cu ta Marisol lo a dal Dammers y a resulta den e hecho cu na Maart 2018, Marisol a wordo condena a base di ley penal pasobra el a practica mentira, pues gaña contra contra Dammers mientras cu despues a bini dilanti cu el a dal Dammers.
E caso a parce di a muri pero a wordo recorda na por ehempel e momento cu problema a surgi den Parlamento tempo cu Adi Thijssen como Presidente di Parlamento a sinti cu Marisol Lopez Tromp tabata pone su integridad na peliger y a recorda Aruba cu Marisol Lopez Tromp a wordo castiga pa loke el a haci cu Dammers.
Na 2021, un problema mas serio a presenta ora Ley a cera porta pa Marisol Lopez Tromp prome cu 2026, bira Ministro di e pais Aruba, cu inclusion di un articulo nobo den e Ley di screening.
E articulo aki a bisa cu un persona cu wordo condena no por bira Ministro durante ocho aña.
Pues si bo a wordo condena durante e ultimo ocho aña, bo no por bira ministro.
Esaki pues ta nifica, cu Marisol Lopez Tromp na e momentonan aki no por bira Ministro pero mester warda te 2026!
Pues si anteriormente e por a ocupa e funcion di Ministro, for di 2021 esaki no ta posibel mas aunke te awor e realidad aki no a bini dilanti cerca Pueblo votador.
Na vispera di eleccion, DIARIO ta indaga den un asunto sumamente serio pasobra hopi votador no ta conciente di cambio di Ley cu a tuma lugar na 2021, pues despues cu el a fungi ultimo bez como Ministro di POR.
Como MAS despues di ultimo eleccion, el a fungi como Miembro di Parlamento y no tabata tin ocasion pa e hecho cu e no por bira Ministro segun e Ley nobo, wordo discuti.
Na vispera di eleccion DIARIO mester a atende cu e asunto aki pa informa su lectornan debidamente.
