ORANJESTAD (AAN) -- Pa finaliza e entrevista exclusivo y interesante aki cu Docter Wilmer Salazar, Consehero di Departamento di Salubridad Publico (DVG), nos a toca e tema di concientizacion, specialmente cerca esnan mas hoben cu no ta cuida
pasobra nan ta kere cu pasobra nan ta jong e virus no ta afecta nan y cu ta hendenan di edad grandi so, y cu malesa cronico tin cu cuida y tuma precaucion. Pero na e momentonan aki tin hopi hoben, na tur otro pais y tin algun caso na Aruba tambe, di hoben cu ta hospitala cu covid-19, cu a bira basta malo, door cu nan a wordo ataca pa e variante britanico cu ta esun dominante, manera Dr. Salazar a trece dilanti, den un articulo anterior.
FOCO DI CONTAGIO RELEVANTE:
Docter Salazar ta kere cu e concientizacion ta un aspecto netamente humano. “Nos tin e oportunidad di controla, na un manera efectivo, e contagio di covid-19. Un di e formanan ta e medidanan di higiene y distanciamento fisico (social), evita lugarnan di aglomeracion.
E termino aglomeracion ta referi na un lugar cera cu tin hende banda di otro, na un distancia menos di 1.5 pa 2 meter. Ora e hendenan ta papia cerca di otro, e droplets of micro-droplets (yama tambe aerosol) por keda cerca di e personanan den un lugar cera, y tarda como tres ora pa cay riba vloer, mientras cu por contamina superficie, obhetonan. Esaki por sosode den un oficina, den lift, of cualkier otro lugar cera unda dos hende of mas ta banda di otro den un espacio chikito.
Aglomeracion ta un importante fuente di contagio. Esaki ta un di e problemanan cu por ta surgiendo den e gyms, cierto misanan, fiestanan familiar, etc., cu ta un di e foconan mas relevante di contagio actualmente”, Docter Salazar a subraya.
GRAVEDAD DI E SITUACION:
Docter Salazar a remarca cu comunidad mester pensa riba e gravedad di e situacion, cu ya nada ta normal mas. “E efectonan psicologico, social, familiar, economico y di salud ta real y nos tine nos dilanti. E unico formanan di por controla e situacion aki den nos sociedad, ta mantene e medidanan, distanciamento fisico, normanan higienico y e VACUNACION!”
VACUNA PREVENCION, NO UN TRATAMENTO:
“ Mester corda tambe cu e vacuna ta prevencion no un tratamento. Pesey, no obstante e vacunacion mester sigui uza tapaboca, tin distanciamento y cumpli cu e medidanan di higiene te ora gobierno ta evalua si e contagio a baha suficiente pa por suaviza e medidanan”, Docter Wilmer Salazar a conclui.
Ainda tin mas tema pa trata cu Docter Salazar, Consehero di DVG, y un fuente hopi importante di informacion pa nos comunidad. Keda pendiente.
