Tempo lo ta generalmente seco
ORANJESTAD (AAN): Di momento no tin ningun disturbio di importancia cu por afecta e weer local. E humedad den e region local ta hopi abou y esaki lo stroba desaroyo di mayoria di nubia cu por produci awacero. Pa motibo di esaki, e weer generalmente seco lo domina.
E concentracion di stof di Sahara den e region a bira menos. Sinembargo, ahinda e lo stroba visibilidad y trece aire di calidad poco abou. Personanan cu tin sensibilidadnan respiratorio mester tene cuenta cu esaki.
Condicionnan Maritimo/Estado di Lama:
- Na partinan proteha di costa: keto, rond di 1 pia.
- Na partinan zuid: trankil te modera rond di 2 pia.
- Na partinan oost te noordwest di costa: generalmente modera cu olanan alrededor di 3 pa 5, localmente 6 pia.
Aviso/Alerta: Ocupantenan di boto chikito mester bay cu cautela na partinan oost te noordwest di costa.
Fenomenonan Special: Ningun.
Tempo Tropical Significante: Un area di mal weer ta move cu un tropical wave den parti central di Atlantico. E sistema aki tin un chance medio pa sigui desaroya den proximo 7 dia y bira un ciclon tropical. Esaki, mientras e ta aproxima e islanan mas noord den parti oost di Caribe.
