Articulo di Siman --- FPNM:
Creando un laso sigur cu bo yoi por yuda nan den hopi manera. Muchanan cu tin un laso fuerte cu nan mayor/voogd (guardian) tin un probabilidad halto cu e lo tin un autoestima halto, presta miho na scol, crea relacionnan positivo, y por maneha stress. Akinan por lesa di 4 maneranan simpel cu por yuda abo como mayor pa crea un miho laso cu bo yiu.
- Sea confiabel
Bo yiu mester mira bo como un lugar di seguridad. Dune consuelo ora e ta malo, tin dolor, of ta tristo. Sea fisicamente disponibel mas frecuente posibel. Ora bo yiu ta sinti su mes safe, e ta explora e mundo riba nan mes, sabiendo cu nan por bolbe bek serca bo pa haya seguridad y consuelo ora nan mester di dje. Anima bo yiu pa purba cosnan nobo door di mustr’e cu bo ta kere cu e por haci’e su mes, pero keda serca di dje incaso cu e mester dibo pa consuelo.
- Sea atento
Tin interaccion cu bo yiu “one-on-one.” Discubri actividadnan cu boso tur dos gusta, hunga weganan hunto, papia y scucha di cosnan cu bo yiu ta interesa aden. Bo yiu mes lo guiabo den kico e mester, no forsa un cierto tipo di interaccion basa riba bo propio necesidad. E actividadnan aki no mester ta uno cu ta tuma hopi tempo, locual ta importante ta e afeccion y atencion cu bo ta duna bo yiu durante e actvidadnan. Contacto di wowo, afeccion caloroso, y harimento lo yuda crea un bon laso durante e interaccion.
- Sea consistente den bo rutina
Muchanan mester di rutina pa sinti nan mes sigur. Ora bo tin rutina pa comemento, tempo di drumi, y cualkier otro actvididnan regular, esaki lo yuda bo yiu establece disciplina propio y un sintmento di seguridad. Ora un mucha sa kico ta bay pasa durante dia, e ta permiti e mucha cuminsa cu e siguiente actividad riba su mes, cual ta encurasha independencia.
- Tene comprension durante separacion
Bo laso cu bo yiu no ta wordo afecta ora bo yiu pasa tempo cu un otro persona. Ta normal pa bo yiu crea un laso cu otro personanan cu no ta nan mayor. Ora bo laga bo yiu cu un otro persona, establece un rutina di bisa ayo. Rutina familiar y conoci ta pone bo yiu sinti su mes mas sigur di su mes. Ta comprondibel y normal pa un mucha sinti su mes insigur ora di separa di nan mayor, pero un mucha ta observa y lo copia e comportacion di nan mayor. Si bo ta mustra cu bo ta sigur di bo mes y cu bo no tin miedo, e tambe lo copia esaki. Algo otro cu por yuda ta si e mucha trece algo di cas cu por dune consuelo. Por ehempel: un klechi of co’i hunga favorito.
Creando un laso fuerte cu bo yiu ta algo hopi beneficioso pa un mucha segun nan ta crece. Oportunidad pa un mayor provee seguridad, afeccion, y rutina lo permiti bo yiu sinti su mes sigur y tin confiansa ora nan explora e mundo riba nan mes.
Fuente: https://childdevelopmentinfo.com/development/how-to-develop-attachment-with-a-child/
Pa informacion of pregunta por acerca Fundacion Pa Nos Muchanan - Cumana 2
