Na entrada di un siman di gran importancia pa diferente religion
ORANJESTAD (AAN) — Awe mundo ta para na entrada di un siman sumamente importante pa diferente religion segun nan creencia.
Ora papia di religion ta papia di un base moral, den cual bon y malo ta wordo defini.
Religion ta mishi pues cu concenshi di hende cu como hende por construi of destrui pa e facultadnan special cu e tin como hende, cu ta haci hende diferente na animal.
Durante e ultimo dos aña e celebracionnan di dianan di fiesta religioso pa mayoria di e Pueblo di Aruba, a wordo afecta pa e pandemia causa pa e Coronavirus nobo.
Aruba ta forma parti di e lugarnan na mundo cu na 2022 por a regresa na normalidad despues di e pandemia.
Pero normal mundo no ta pa motibo di e hecho cu un homber yama Vladimir Putin, a dicidi cu e mester ta doño di e Pueblo liber di Ukraine, cu el a invadi.
Na e momentonan cu nos ta redacta e articulo aki, Putin ta sigui mata mucha recien naci. E ta sigui mata ancianonan cu no tabata tin forsa pa huy. E ta mata tur loke ta stroba su poder.
Mundo, cu awe mester a subi e caminda di recuperacion despues di Covid-19, ta wordo stroba den su intento pasobra tur placa cu mester a yuda superacion di tanto problema cu e pandemia a causa, mester wordo uza pa arma pa e guera di Ukraine.
Con un hende cu ta bisa cu e ta kere den Dios, por sostene Vladimir Putin? Esaki ta e pregunta grandi na inicio di un siman, cu pa tradicion di Iglesia Catolico ta wordo yama Semana Santa.
Otro religionnan, manera ya bisa, tambe conoce dianan religioso importante den e siman aki, cu ta pone un acento special riba hende cu den religion ta busca e salida di loke ta haci dolor, loke ta oprimi, loke ta kibra hende.
Kico e Pueblo di Ukraine ta sinti awe? Con e hende na Ukraine ta sinti su mes den e sonido di bomnan cu ta rementa, e realidad di morto cu Putin mester sembra pa e haya loke e ta horta di hende inocente den gran cobardia?
Con kere den Dios y sostene Putin? Esaki ta e pregunta mas grandi cu nos tin na entrada di Semana Santa 2022.
Con un hende cu ta yama su mes hende por baha te na e nivel di Vladimir Putin y tur su siguiedornan rond mundo hasta den porta di Aruba?
Awe medionan di comunicacion ta permiti nos mira di acerca dolor y sufrimento di tanto Pueblo cu a bira victima di dictador, di despotanan destructor cu ta yama nan mes hende.
Nan por sigui existi mientras tin hende cu ainda kier placa di Rusia, placa di tirania, mancha na sanger. Placa Comunista, cu ta cumpra curason di e pober pa bira poderoso.
Con hende por kere den Dios si nan ta sostene Vladimir Putin y su masacre di inocente?
Un pregunta pa cual nos no tin contesta!
