Workshop pa Mayornan
ORANJESTAD (AAN): Nos ta bibando den un mundo globalisa caminda e problemanan di un pais ta afecta henter mundo. E peligernan riba internet awendia ta afecta no solamente paisnan grandi sino na cualkier luga di mundo cu lo conecta na internet.
Nos muchanan, teenager y hende jong no ta consciente di e peligernan aki. Ta trata di modalidadnan nobo di crimen y manipulacion di mente di hende ta mas fuerte awor pa social media, y hopi di nos adulto no a ripara esei mes.
Crimen cibernetico a aumenta 150% den e grupo di menornan di edad rond di mundo. Menornan ta e grupo mas vulnerable pa ser conecta pa desconocinan di cualkier luga di mundo. Robo di identidad, challenge online, cyberbulliyng, sexting, pornografía, turismo sexual infantil, ta algun di e delitonan contra nos yiunan.
Pesey ta asina importante cu nos adulto por siña di e peligernan actual di internet y social media, con nan ta funciona y kico nos por haci pa cuida nos mes pero vooral pa cuida e curason di nos muchanan, teenager y hobennan.
Nan inocencia pa su edad suma na nos desconocemento como nan guía ta un mix cu por trece hopi dolo den curason di nos hende jong i den nos tur como famia.
Nos kier invita tur esnan cu ta interesa pa siña mas tocante e tema aki bin scucha y pone bo mes aldia pa sa con pa trata cu bo yiu.
E Workshop aki lo tuma lugar den e sala di conferencia na Fundacion Centro Famia Piedra Plat, diabierna dia 7 di October 2022. For di 7:00 pa 9:00 pm. Adres: Piedra Plat 50. Entrada Gratis, idioma Papiamento. Facilitador: Jairo Piraneque, cu tin master degree den educacion familiar y juvenil y cu amplio experencia.
