Jesseline Kelly, PR di DAS ta splica:
*Tambe ora e cliente tin cu drenta HOH
ORANJESTAD (AAN) – Señora Jesseline Kelly, Relacionista Publico di Departamento di Asunto Social (DAS) a sigui elabora den entrevista cu DIARIO, tocante e tema 'Apoderamento' cu nan a trata e luna di Maart aki, den nan facebook page, 'Bijstand'.
Dentro di e contexto aki el a splica kico mester haci ora e cliente ta un pashent cu AZV ta manda afo pa cuido medico. El a bisa cu hopi biaha ora cu clientenan bay den exterior, nan estadia afo por wordo prolonga.
Pesey ta hopi importante pa e apoderado cu ta keda encarga di cobra e bijstand pa e cliente, aki na Aruba, informa e departamento di cualkier cambio of prolongacion cu por bin, e mester bay AZV pidi e comprobante di esey, y hibe atrobe na DAS pa informe cu e cliente aki, mester a keda te tal fecha pero akinan tin e comprobante cu e ta bay keda pa mas tempo. Esey ta hopi necesario pa preveni sancion.
E di dos motibo valido di con e cliente por apodera un hende ta si e ta wordo interna den Hospital.
“Uno, nos ta conoce e estadia planea cu bo ta drenta Hospital y naturalmente un estadia inespera, cual ta algo cu por pasa cu nos tur. Pa un estadia planea bo ta bin nos departamento cu e apoderado, ID valido, e carta di hospital, persons number di e apoderado, pa asina bo cuminza cu e proceso.
Pa un estadia no planea, algo cu a pasa inesperadamente, mester acerca e trahado social di Hospital, ken ta bay guia e cliente cu e proceso, pa asina apodera un otro hende pa cobra e bijstand p’e. E ta manda un carta pa nos departamento pasobra e ta conoci con e proceso ta cana, naturalmente; unda e cliente na hospital ta apunta of pone e persona cu e ta desea pa cobra e bijstand p’e, nan ta firma e carta cu ID, e sa con e proceso ta cana, y ta manda e carta pa nos”, Jesseline Kelly, PR di DAS a duna di conoce.
