ORANJESTAD (AAN): Awe ta Yom Hashoa (Dia di Conmemora Holocausto), un dia unda comunidadnan Hudio rond mundo ta reuni pa honra e bida di esnan cu a fayece y esnan cu a sobrevivi e Holocausto.
Riba e dia aki nan ta refleha y recorda e genocido di seis miyon Hudio door di Alemania ocupa pa Nazi.
Cada aña, specialmente riba e dia aki nan ta bolbe compromete nan cu e promesa pa ‘nunca mas’. Sinembargo, lamentablemente nan ta sigui di ta testigo di e horornan cometi riba civilnan inocente. Sinembargo, Yom Hashoa ta sirbi como un recordatorio di advertencia cu mester tin e obligacion moral di tuma medidanan contra atrocidadnan asina, unda cu ta cu nan socede.
Comunidad Hudio di Aruba, Beth Israel Synagogue a reuni pa honra y recorda e victimanan y e sobrevivientenan door di tene un servicio conmemorativo na nan honor. Durante e servicio aki a cende seis bela, cada uno simbolizando un miyon di alma Hudio perdi.
E belanan a wordo cendi door di diferente miembro y invitado di Beth Israel Synagogue. E prome bela a wordo cendi pa un di e miembronan di mas edad di e Congregacion, y e ultimo bela a wordo cendi pa un di e miembronan mas hoben di e Congregacion, representando e futuro y continuidad di pueblo Hudio.
Ohala e recuerdonan di e victimanan di Holocausto ta un bendicion, mientras cu nan ta haci oracion pa paz, respet, y igualdad, cu ta hopi necesario awor mas cu nunca den un periodo unda e antisemitismo ta aumentando un biaha mas.
