Parlamentario Rocco Tjon:
ORANJESTAD (AAN): Miembro di Parlamento Rocco Tjon a reuni cu un grupo di Haitiano, biba na Aruba, y a haci pregunta oficial na Minister Dowers tocante e dificultadnan cu e comunidad Haitiano na Aruba ta enfrenta tur dia.
E dificultadnan aki ta relaciona cu haya permiso di estadia, y tambe pa por invita nan famia pa bin pasa un rato na Aruba pa vakantie of bishita. Nos tin hopi aprecio pa e comunidad Haitiano cu ta traha duro den diferente sector na Aruba pa hiba e pida baranca aki dilanti. Nan ta duna aporte na nos economia y nan merece un trato humano y husto.
Hopi Haitiano no ta haya contesta riba nan peticion na DIMAS, y hopi biaha ta wordo pidi documentonan cu no ta facil pa haya. Esaki ta pasa pa motibo cu e situacion den Haiti ta hopi dificil, pero asina mes si logra haya tur documento, no ta haya contesta di DIMAS. Esaki ta pone hopi famia den tristesa, stress y decepcion.
No ta husto pa hende cu ta biba y traha legalmente na Aruba, no por laga nan sernan keri, manera un mama, tata of yiu bishita nan.
Mi a pidi claridad na sr. Dowers riba e situacion actual y kier sa cua medidanan concreto ta ser tuma pa yuda e comunidad Haitiano den e lucha aki.
