Problemanan produci pa hende ta topa cu loke no ta den man di hende
*2024 ta honra e pronosticonan di un mundo cu ta zink den caos
*Black out total na Venezuela y Merca cu eleccion di categoria Cero
ORANJESTAD (AAN) — Lamentablemente e pronosticonan cu DIARIO a entrega Aruba pa e situacion mundial na 2024, a bira realidad y ta duna tur prueba, di entrega na mundo un entrada sumamente peligroso pa enfrenta 2025.
E desaroyo mundial ta sumamente preocupante ya cu 2025 a wordo considera e aña den cual diferente factor importante lo a topa.
2025 lo a bira e aña den cual e generacion cu a percura pa e mundo moderno di awe a conoce su base, lo sigui despedi sigur den bida activo.
Aruba den e epoca aki a conoce un cambio enorme. Lago y Turismo a habri caminda pa economia di e pais, cu durante Covid-19 cu a amenaza di aplasta henter mundo, a conoce un gobernacion excelente na man di Evelyn Wever-Croes, cu manera pruebanan ta demostra a bira uno di e lidernan gubernamental mas prominente y capaz cu Aruba a conoce.
Resultado ta awe un Aruba cu a base di un recuperacion historico y excepcional, ta briya den un mundo cu factornan peligroso cu no ta den man di Aruba.
Awe, e comunidad di Aruba tin e deber pa lucha pa mantencion di loke el a logra, dor di como Pueblo ehemplar na mundo, enfrenta situacionnan cu ta peligroso pa Aruba.
Ora papia di e Temporada di Horcan, cu te awor tabata parce sumamente trankil pero awor ta duna prueba cu Aruba mester ta alerta.
Atencion ta dirigi riba un sistema pafor di Caribe ainda, cu mester yega mas cerca pero tin e posibilidadnan pa sigui desaroya.
E ta uno di e desaroyonan den fin di siman den Atlantico, cu tabata hopi trankil pero awor ta drenta e temporada cu pa e region di Aruba ta produci mas horcan.
Mientras DIARIO ta prepara e edicion aki, tabata evidente cu Aruba mester sigui informacionnan di tempo y sigui tur instruccionan cu lo mester wordo emiti den caso cu condicionnan di tempo por bira peligro pa Aruba mes y pa bishitantenan.
Cambio di clima ta uno di e problemanan grandi rond Merca y otro partinan di mundo. Pa Aruba, e situacion na Merca pues ta importante.
E calor inmenso na Merca ta haci cu turistanan ta opta mas y mas pa vacacionnan cu ta hiba nan ba lugarnan mas fresco. Pa habitantenan di Merca, no ta cambio di clima pero tambe cambio di Presidente ta e problema grandi.
E situacion general na Merca ta uno desconoci casi pa e pais, cu ta hundi den un confrontacion politico pa eleccionnan na e pais na November.
E calidad general di politica na Merca a baha na un nivel increibel pa Merca y a transforma e actual proceso electoral di Merca den un situacion cu tin nos preocupacion serio.
Na prome lugar nos miedo di confrontacionnan a base di aspectonan peligroso manera raza, cu mundo y Merca tambe a supera hopi tempo pasa, ta bolbe surgi na momento cu raza ta wordo uza como un arma pa campaña den un situacion increibel.
Si antes figuranan autentico Americano, cu a lucha pa igualdad di raza basa riba resultadonan mientrastanto supera manera catibonan importa di Africa, manera Martin Luther King a bini dilanti, actualmente raza ta wordo uza na un forma cuestionabel.
E Mericano di color autentico no ta na e frontline di un surgimento nobo di lucha pa raza cu no tin balor autentico pero si ta sumamente peligroso. Kamala Harris no a yega Merca for di Africa pero ta personifica e mayoria Caribense.
E tata di Kamala Harris a bolbe su pais natal como Caribense, pero raza di su antepasado Africano desconoci, ta motibo di un situacion sumamente peligroso na Merca, cu confrontacionnan cu solamente rabia y odio racial por produci y cu Merca a supera hopi tempo pasa.
E realidad di Donald Trump tambe ta discutibel den su relacion cu Husticia. Central ta keda e calidad di eleccion cu pais manera Merca ta produci.
Pa Aruba esaki no ta e unico preocupacion. E situacion na Venezuela ta empeora. E pais a conoce un black out total, cu a afecta su refinerianan.
Un desaroyo cu tabata tin impacto directo pa sector internacional di petroleo na un momento cu henter mundo ta vigila e desaroyonan sumamente peligroso na Venezuela, cu Aruba mester vigila.
Informacionnan ayera ta indica cu na ciudadnan manera Maracaiba, gruponan di personanan cu tabata tin nan bon entrada den e industria petroleo, ta prepara pa bandona e pais.
Den un situacion mundial, Aruba cu a recupera na forma milgroso y a bira un diamente exclusivo, mester conta mas cu nunca cu Arubianismo cu ta contene aporte di cada Arubiano pa confronta un temporada di horcan peligroso cu ta bati na porta pero tambe desaroyonan mundial negativo cu por tin impacto pa Aruba!
September a bati na porta. September di culminacion di temporada di horcan. September di entrada definitivo pa eleccionnan na Merca y circumstancianan crucial na Venezuela.
Gobierno di Hulanda y Reino mester atende situacionnan local basa riba emergencia.
Aruba tin e deber pa lucha pa mantencion di un recuperacion milagroso a base di un gobernacion historico y Aruba mester duna tur su cooperacion pa enfrenta problemanan cu no ta origina of ta den man di Aruba pa asina sigui disfruta di adelanto!
