Fiona ta sigui su rumbo devastador como horcan mayor
*Calor y humedad ta afecta pashentnan di varios malesa
*Na tera y riba lama tambe hende tin riesgo den su man
ORANJESTAD (AAN) — Un disturbio na entrada di region di Caribe ta duna indicacion cu e ta kita atencion for di Fiona, e sistema cu a tuma e rumbo pa Noord di region di Caribe, caminda el a crea un desastre natural.
Cu Fiona como horcan mayor pa Noord di region di Caribe, e situacion cu e ta crea pa henter e region di cual Aruba ta forma parti, ta uno di instabilidad enorme, cu cualkier momento por provoca formacion di nubianan pisa capaz di produci yobida, strena y lamper.
Na momento cu otro sistema kier drenta region, ta bon pa recorda publico cu National Hurricane Center di Merca a wordo acepta como e autoridad cu ta centralisa tur accion necesario pa informa Region di Caribe, Golfo di Mexico y e region Atlantico den cooperacion estrecho cu tur servicio meteorologico den e region.
Nan ta experto cu ta guia publico, cu durante e temporada aki di horcan tin un tarea sumamente importante den su man.
Ningun hende por dicidi con clima ta comporta su mes. Hende, sinembargo, por dicidi con hende ta comporta su mes.
Na e momentonan aki Aruba y henter e region di Caribe ta experencia condicionnan di tempo cu ta uni humedad cu un calor intenso. Esaki ta e base ideal pa yobidanan pisa cu strena y lamper.
Yobida fuerte causa pa situacionnan manera Aruba conoce actualmente, ta dificil pa pronostica sin mas.
Autoridad meteorologico ta menciona cu e condicionnan ta favorabel y ta guia Pueblo. Pero ta imposibel pa nan bisa cu 5 minut prome cu 5or, un nubia cu por produci yobida pisa, ta cuminsa crece.
Na Aruba, tur hende por nota cu tin cambio den condicion di tempo.
Arubianonan ta conciente cu biento no ta bini di e direccion normal, cu biento ta debil, cu yobida por presenta.
For di momento cu temporada di horcan tabata na caminda y sigur ora el a cuminsa, a pidi tur hende pa ta prepara pa un temporada activo.
Na e cumbre di temporada di horcan, tur hende tin un responsabilidad grandi y esaki ta, evita peliger pa nan mes.
E calor cu tin Aruba basta dia den su gara, tin resultado pa hendenan cu ta sufri di cierto malesa. Personanan cu problema cu presion di sanger, pulmon, curazon sigur ta den e grupo cu mester cuida nan mes.
Percura pa tuma medicamento y evita situacionnan cu ta afecta salud of ta crea emergencia pa profesionalnan cu mester atende cu nan.
E comportacion di biento, cu ta wordo spera di normalisa mientras Fiona ta aleha, ta crea condicion di tempo peligroso pasobra e ta deshaci di e brisa cu cual publico na Aruba a costumbra.
Den e temporada aki tin un grupo cu mester evita bebida alcoholico, mester evita situacionnan cu ta produci hopi cansancio.
Cu e condicion di tempo ta afecta lama tambe, tur hende sa. Informacion concreto a wordo duna con e pasashi di horcannan ta afecta coriente di lama por ehempel.
Mester tene esaki na consideracion.
No crea situacion cu autoridad mester brinda asistencia den circumstancia peligroso.
Ta e momento cu mester haci tur tereno rond di cas limpi pa evita problema na momento di yobida fuerte.
Mester trece e puntonan aki dilanti pasobra tin un grupo den comunidad cu mester subi caya pa brinda asistencia. Nan tambe tin famia. Nan tambe ta hende.
Rond mundo ta topa cu e fenomeno di hende, cu kier crea situacionnan peligroso pa nan mes y pa otro.
Mas y mas autoridad internacional ta registra personanan cu ta spera pa ora lama bira bruto, nan bay enfrenta ola. Pa ora situacion ta mas peligroso cu nunca riba caretera, nan bay crea e impresion cu nan no tin miedo mientras nan man ta tembla.
Mundialmente organisacionnan cu ta brinda asistencia, ta registra mas caso di persona cu ta pone nan mes na peliger y ta crea peliger pa otronan.
Naturalesa no ta juguete.
Mester pensa semper riba personanan cu mester bandona nan cas pa bay traha y brinda asistencia na hende den problema manera personal di seguridad pero tambe di hospital y tur cu mester drenta den accion pa presta asistencia.
Cuida bo mes! Esaki ta e advertencia mas importante cu e condicionnan di clima, ta entrega hende cu tin como miho proteccion, su sentido di responsabilidad pa su mes y pa otro.
