Fundacion Arte di Palabra ta invita un y tur pa participa na e di diesocho competencia di haiku Elis Juliana.
Cada persona por skirbi uno te diez haiku y manda esaki prome cu 16 di februari 2025 pa Ange Jessurun, na This email address is being protected from spambots. You need JavaScript enabled to view it.
Por participa den e siguiente categorianan:
Alumno di klas 1- 2 di enseñansa secundario
Alumno di klas 3-6 y EPI klas 1-2
Tur otro persona interesa di islanan ABC
Lo menciona e ganadonan durante final di Arte di Palabra Corsou dia 12 di april 2025, y lo publica e miho haikunan. Elis Juliana ta esun cu a introduci haiku, un forma literario Hapones, na Papiamento. Elis Juliana (1927 -2013) a skirbi un cantidad di cuenta cortico, mas cu un dozijn di colección di poesia y a contribui grandemente na desaroyo di mucha. Banda di autor, el a haci uzo di e parti ritmico y tonal di Papiamento, creando asina su propio estilo.
Competencia di haiku na Papiamento
Na ocasion di celebracion di ochenta aña Elis Juliana (2007), a dedica atencion na tur e habilidadnan/ facetanan artístico di e gran yiu di tera aki.
Elis Juliana a nace na Corsou na 1927. For di 1950, el a cuminsa skirbi cuenta cortico, y tin un coleccion grandi di poesia y cuenta.
Kico ta haiku?
Por bisa cu haiku ta un arte di palabra.
Haiku ta un forma di poesia Hapones masha cortico cu ta existi pa hopi siglo caba. E ta diferente for di poesia ritmico of poesia cu ta rima cu bo a custumbra cu ne. E ta manera un potret cu ta capta esencia di loke ta pasando.
Cu solamente algun palabra, un haiku ta capta bo atencion y ta bisa bo: wak esaki of pensa riba esaki.
Originalmente, haiku Hapones ta trata di naturalesa. Awendia e por trata cualke tema. Elis Juliana ta bisa cu el a probecha di haiku pa duna pueblo balor di forsa di palabra.
Haiku ta poema di diesshete silaba parti den tres unidad di cinco, shete y cinco silaba.
Con ta skirbi haiku?
Scohe un tema y skirbi algun palabra cu bo conoce di e tema.
Haiku no tin titulo. E ta para riba su mes.
Un haiku por describi casi tur topico. Basta e no ta mucho complica, y e ta simpel y comprendibel. Un bon haiku ta describi suceso di bida diario na un manera cu ta duna e lesado/scuchado un bista completamente nobo/diferente di un situacion ya conoci.
Parti bo pensamentonan den tres liña: den e prome bo ta introduci e topico, haciendo un ponencia.
Caba amplia esaki:
- Expresando un sintimento
- Haciendo un observación of splicando un accion.
Un haiku ta duna un sabidoria di bida of ta duna un mensahe.
Polish bo haiku te ora e forma tres liña, e prome di cinco, e di dos di shete y e di tres di cinco silaba. Esaki por tuma tempo, pero sigui cambia palabra te dia bo logra.
Tip: expresa un solo sintimento of emoción den bo haiku. Pensa riba un experencia of bista comun na un manera nobo y diferente. No ta uza abreviacion, cada palabra ta riba su mes.
Por uza solamente palabra na Papiamento.
