Rodymar Geerman di IBiSA:
- Ta cuminza cu e parti di trefbal pa categoria di scol basico
ORANJESTAD (AAN) Señor Rodymar Geerman, Hefe di Departamento di Desaroyo di IBiSA y tambe di Desaroyo di Deporte pa aña 2025-2026, den conferencia di prensa reciente a reitera cu e aña aki IBiSA ta bay continua cu su calender di deporte escolar y e weganan interinsular.
“E aspecto mas nobo cu ‘a caba di wordo saca di forno’ ta CONCECADE. Pues, e aña aki nos ta bay atrobe cu nos calender escolar, unda cu tur scol a haya nan pakete caba. Tur a wordo parti pa tur scol y asina ta keda mas cu claro p’asina scolnan registra na e diferente competencianan cu nos ta bay tin.
“Dentro di e competencianan aki, bo ta competi pa bo clasifica pa bo weganan escolar. Tin cu ta bay direct pa weganan interinsular, y esey tin e parti recreativo, e parti un tiki mas competitivo, y despues nos ta yega na e parti di competi mes”, Rodymar Geerman a señala.
El a subraya cu lo mas cu nan kier ta pa e muchanan di scol ta, pa participa, engrandece e deporte, p’asina nan ta cu movecion p’asina contribui cu nan salud.
Geerman a duna di conoce cu nan ta bay cuminza na fin di September caba, cu e parti di trefbal pa categoria di scol basico. “Nos ta parti’e den tanto KO cu ta bira Kleuter Onderwijs como BO cu ta bira Basis Onderwijs, y VO cu ta voortgezet Onderwijs (scol secundario). Esaki ta e tres cuadronan cu nos ta parti nos eventonan di calendario, di tanto 2025 pa 2026 unda cu diferente luna, unda por cierto, den un luna por haya dos pa tres deporte mes, di tanto KO, BO como VO. Asina nos ta parti calendario, scolnan ta registra, y tin diferente categoria unda cu muchanan di diferente edad y diferente klas por participa”, Rodymar Geerman a señala. Tin tanto team competitivo como tambe individual. “Esaki ta locual nos kier brinda e aña aki p’asina engrandece e deporte escolar na Aruba”, Rodymar Geerman a indica.
