Segun lider di STA, Diego de Cuba:
ORANJESTAD (AAN) Señor Diego de Cuba, lider di STA (Sindicato Trahadornan Arubano) ta sigui comenta, den entrevista cu DIARIO, cu e compania Thiel Corporation, pa casi cuater aña ta reteniendo placa di pensioen di su trahadornan, sin cu e ta mand’e over.
Esaki ta completamente p’afo di ley. De Cuba a indica cu tin un ley ‘LAP’ cu a drenta na vigor na 2012, cu ta indica cu un compania cu no ta cumpli cu loke e ley aki ta describi, por haya un multa te 250 mil florin.
“STA a consulta cu Mediador di Gobierno, y nos a atende e asunto aki cu e companianan corespondiente, y Thiel Corp. a manda un carta caminda e ta delinea con e ta bay cumpli cu e pagonan atrasa, pero te dia di awe nos no por a haya copia di e carta ey tampoco. Anto, esey tambe ta un motibo pakico nos ta bay acerca WAB. (Werkgevers Arubaanse Bouwnijverheid), pasobra esey tambe ta un violacion total di e acuerdonan den e Contrato Colectivo. No esey so. E ta violacion di e LAP”, Diego de Cuba a señala.
E lider di STA a señala cu nan mester di señor director Anthony Thiel na mesa, p’e splik’e na placa chikito, cu e mester carga cu e gastonan deriva di e asunto di pensioen aki.
Esaki den sentido cu e banconan no ta worry di unda e placa drenta, pero si bo tin un compromiso cu banco bo tin cu cumpli cune, y esaki ta e aspectonan cu ta haci dolor.
Kizas lo bay Corte, pero prome tin cu wak con leu e asunto aki ta bay. “Si Thiel ta bay di acuerdo cu locual nos ta bay trece dilanti, anto e ora ey mi ta kere nos por evita e caminda ey”, Diego de Cuba a señala.
Esaki no ta prome biaha cu ta sosode, segun e sindicalista. Desde 2023 caba y aworaki na 2025 den cabamento di aña atrobe STA tin cu interveni den e situacion aki. “Mi ta kere ta tempo pa señor Anthony Thiel bira un tiki mas serio pa cu e compania, y tambe pa e bira mas sincero y habri cu e trahadornan, no sconde informacion ni haci cosnan cu ta completamente foi sla, manera keda sin cumpli cu e contrato colectivo y cu e leynan laboral, ni ley di pensioen cu ta cosnan cu no por continua. Asina Diego de Cuba a relata.
