Giantcarlo Croes di Banco Central di Aruba (CBA):
ORANJESTAD (AAN): Banco Central di Aruba (CBA) ta haci un suplica na e 4.000 hogarnan selecciona rond Aruba pa coopera cu e Encuesta di Forsa Laboral 2026, cu ta tumando luga te cu 28 di november.
Departamento di Labor y Investigacion, Oficina Central di Estadistica y Banco Central di Aruba ta realisa e investigacion conhuntamente pa obtene un bista actual di e mercado laboral. E encuesta ta colecta informacion tocante empleo, desempleo y participacion laboral, cu lo sirbi como base pa analisis, conseho y formulacion di maneho.
Segun Giantcarlo Croes di CBA, e seleccion di 4.000 hogar ta basa riba metodonan estadistico cientificamente comproba. El a splica cu pa un populacion di mas di 100 mil habitante, 4000 hogar ta representativo y ta duna un bista di ful e populacion.
Croes a enfatisa cu participacion di tur persona di 15 aña bay ariba por tuma parti di e encuesta. Actividadnan manera trabao digital of yena saco y garoshi den supermercado tambe ta relevante pa e informacion cu e encuesta ta busca pa colecta.
El a splica cu CBA ta analisa e desaroyo economico di Aruba y cu mercado laboral ta un parti esencial di economia. El a enfatisa cu pa haci un bon analisis, ta necesario pa dispone di datonan completo y confiabel.
P’esey, cooperacion di e hogarnan selecciona ta fundamental. Nan participacion lo contribui na un bista mas completo di e realidad laboral di Aruba, permitiendo e instancianan duna conseho miho fundamenta y Gobierno por formula miho maneho basa riba informacion actual.
