ORANJESTAD (AAN): E presidente di Organizacion di Pensionadonan Publico Arubano (OPPA),
esta Ivo Valdes a splica cu nan ta representa mas di 1.600 miembro cu ta ex-trahador publico, y nan ta hopi preocupa pa cu e Fondo di Pensiun APFA.
Tin di corda cu na aña 2005, Gobierno a privatiza e Pensioenfonds. APFA a bira un Fundacion cu ta los di Gobierno, y ta un instancia riba su mes. Y awor ora cu bay introduci e ‘normering top inkomens’ riba e Director- y Staf di APFA, bo ta bay crea un situacion caminda cu probablemente e ehecutivonan ey lo bandona nan puesto si acaso nan haya un mihor oferta, y riba dje lo bo no haya otro hendenan cualifica pa maneha un fondo asina grandi manera esun di APFA cu ta maneha mas di 3 miljard Florin.
Si bo wak bon, APFA ta cumpli cu e ley di LOP (Landsverordening Ondernemings Pensioenfonds), y tur e puntonan di maneho di Banco Central, tur punto di maneho di Richtlijn Bedrijfs Economisch Toezicht, e punto di maneho di Pensioenfonds Governance Richtlijn, y tambe Richtlijn Integere Bedrijfsvoering. Pues APFA ta cumpli cu tur e leynan, y OPPA no ta mira pakico Gobierno ta bay mete, door di trece e fondo di pensionadonan na peligro.
“Nos no kier bolbe na e tempo di PVL, nos a bay laga PVL cu un grado di cobertura di 85%. Aworaki APFA tin un grado di cobertura di 108,4% neto,” Ivo Valdes a indica. “Esey kiermeen cu e fondo ta draai bon, y mester percura pa e fondo keda solvable, pues no por hinca e fondo den peligro.”
Na opinion di OPPA, na momento cu Gobierno bay mishi cu salario di e hendenan ey, e fondo ta bay core peligro.
