Preparacion pa e siguiente Ciclo Olimpico a cuminsa
ORANJESTAD (AAN): Cu e ultimo ciclo Olimpico awo tras di lomba y e proceso di evaluacion den su fase final, departamento tecnico “Direccion di Deporte” a inicia e planificacion competitivo pa loke ta trata e e proximo aña nan. Como Comite Olimpico, e siguiente ciclo Olimpico cu tin como evento final e Weganan Olimpico di LA2028.
Na 2025 ta inicia cu un Wega clave cual ta e Weganan Panamericano Junior, Asuncion 2025. Den cuadro di esaki, a hasi un peticion oficial na tur Federacion miembro di Comite Olimpico Arubano pa entrega informacion na nivel tecnico p’asina por cuminsa na planifica posibel participacion na e diferente weganan di aña 2025 en adelante.
Un total di 24 federacion a ricibi un email di parti di COA, splicando e proceso y locual lo mester entrega consecuentemente asina por wordo inclui den e proceso di planificacion y posibel participacion. E informacion mas esencial cu a ser pidi ta un lista di atletanan cu cada Federacion ta presenta pa ser tuma den consideracion. Esaki lo mester a bay a base di un analisis di resultado di e ultimo aña(nan), un muestra di e desempeño tecnico di nan deporte y mester ta conforme e standard cu a ser estableci y informa na tur Federacion miembro den e carta cu a ser entrega na februari 2022, caminda ta ser demostra cu cada atleta cu wordo presenta, lo mester tin pronostico di ta un posibel finalista na e weganan cu e lo por participa.
E rason principal pa desicion tecnico aki di parti di COA ta pa percura cu e nivel di atleta cu ta logra representa Aruba na nivel di weganan den ciclo Olimpico ta uno di bon calidad. Banda di esaki, a haci peticion pa entrega un plan competitivo cu ta inclui e parti di e presupuesto pa tur evento, training y/of cualkier otro necesidad cu e atleta lo tin pa cu e aña calendario. A base di e informacion aki, hunto cu e plan tecnico cu lo mester wordo entrega mas laat den aña, COA lo traha un lista preliminario di e atletanan cu posibilidad di participacion na Weganan den e siguiente ciclo.
E proceso di aki ta un parti e maneho tecnico cu COA tin ta ehecuta pa algun aña caba, cu ta un parti clave pa e exito y desaroyo di #TEAMARU durante e ultimo ciclo Olimpico di Paris2024, unda a logra mehora resultado y logrando Aruba su prome diploma Olimpico, pues un Top 8.
Comite Olimpico Arubano ta desea di sigui riba den e bon rumbo aki pa cual e colaboracion y participacion activo di nos Federacion nan local ta esencial pa logra haci esaki uno exitoso.
