ORANJESTAD(AAN) Den conferencia di prensa di Gobierno, e Relacionista Publico señor Junior Arends, den nomber di e Comision Celebracion Dianan Nacional,
a yama un conferencia di prensa pa duna informacion tocante celebracion di Dia di Betico, 2025.
Arends, na prome lugar a expresa palabra di disculpa cu Minister di Cultura, señora Xiomara Maduro no por tabata presente, pa motibo di salud.
Encuanto e preparacionnan cu ta tumando lugar den e Siman di Betico aki, lo celebra diabierna 24 y diasabra dia 25, y a invita henter comunidad pa para conhuntamente y celebra e dia dedica na e Libertador di nos pais, señor Gilberto François Betico Croes.
Junior a recorda cu tur aña tin dia 24 di Januari, e manifestacion cultural y dia 25 e acto protocolar. E aña aki lo no ta diferente, pa cual e ta invita comunidad pa por presencia esakinan.
Manifestacion Cultural: Tocante e manifestacion cultural, Diabierna 24, e programa ta inicia pa 6 or di atardi, riba Plaza Libertador Betico Croes, unda lo tin Feria Culinario, Artesania, mas cu 30 tent cu lo ofrece coi dushi na tur e publico presente.
Pa 6’or y mey lo tin presentacion di Trio Los Arubeños, cumpliendo 60 aña cu nan ta dedica nan cancionnan; nan talento, na comunidad di Aruba, y nos kier brinda honor na nan, pa nan por brinda un espectaculo na e publico presente.
Pa 7.30 pm lo inicia locual ta e yegada di invitadonan special y mandatarionan, p’asina pa 8’or por cuminza cu e manifestacion cultural. E ta inicia cu Himno di Aruba, sigui pa palabra di Minister di Cultura, señora Xiomara Maduro, pa despues presenta un concierto dedica na Libertador Betico Croes.
Esaki ta un produccion prepara pa e talentoso Edseline Figaroa, ken lo wordo acompaña musicalmente pa un orkesta, dirigi pa e maestro Dwight Leoneta.
E anochi aki lo clausura cu un Concierto di Grupo di Betico, cu lo dura mas di un ora pa pueblo di Aruba en general por disfruta di dje.
Acto Protocolar riba Diasabra: Esaki lo cuminza pa 8.30’or di mainta, cu yegada di e mandatarionan. Pa 8.55 am Gobernador Alfonso Boekhoudt lo yega cu su señora. Lo sigui cu Himno di Aruba, discurso di Prome Minister, un oracion di parti di Pastor Toti Fuentebella.
Asina lo sigui cu e programa, cu un poesia “Nos Libertador” dedica na Betico, declama pa Guizza Maria Steenvoorde y seguidamente tin e presentacion di mas hoben. Pues, lo tin un bunita y digno Acto Protocolar pa celebra Dia di Betico.
Ta sigui e acto di ofrenda floral door di Gobierno di Aruba, famia Croes, Fundacion Betico Croes y Cuerpo Consular. Un invitacion special ta wordo haci pa miembronan di prensa pa cubri e evento aki pa e informacion yega na tur cas.
