Señor Herrick Henriquez, Director di Asociacion ATIA:
ORANJESTAD (AAN): Señor Herrick Henriquez, Director di Asociacion ATIA a enfatisa cu Aruba no tin poder pa stipula prijs di producto. Den un entrevista recien cu DIARIO, señor Henriquez a señala cu comerciantenan door cu no por stipula prijs, semper lo sigui busca un manera pa haya productonan di miho calidad y miho prijs. Un ehempel di esaki ta webo. Na Merca prijs di webo a subi pa casi $12,-, Aruba a bay busca otro caminda y a busca solucion pa nos tin webo mas barata.
Señor Henriquez a remarca cu esaki ta conta tambe pa tur otro producto. Si por ehempel na otro paisnan e prijs ta mas barata cu na Merca pa cierto producto, Aruba ta cumpra na di e paisnan ey. El a agrega cu comerciantenan na Aruba, siendo un isla chikito, tin conexionnan rond mundo, pasobra e mercado di importacion ta hopi competitivo. Pa e motibo aki tambe, señor Henriquez a remarca, comerciantenan ta bay busca miho prijs pa Aruba.
Segun señor Henriquez, mientras cada biaha ta bisa of insinua cu ta comercio ta hisa prijs, e realidad ta cu ta Gobierno ta esun cu por yuda baha prijs. Ta Gobierno tin impuesto riba dje. “Si di berdad tin e pueblo na pecho, mester traha pa baha impuesto pa comunidad por tin mas poder di compra”, señor Herrick Henriquez a duna di conoce.
