Gregory Fun A Fat, United Farmers Aruba:
ORANJESTAD (AAN) – Gregory Fun A Fat di United Farmers Aruba, den entrevista cu DIARIO a bisa cu Aruba ta den un posicion, aworaki, cu hopi hende eyfo ta wak. Esaki den cuadro di e desaroyo di plantacion na Aruba, unda el a señala cu den Caribe ta mescos.
El a comenta cu recientemente, el a haya un email di un persona di Guyana, cu ta bay inverti mas cu 15 miyon dollar. “Pasobra e situacion no ta solamente pa e Isla, pero e ta mundialmente. Si no inverti awe, si algo lo mester pasa mester tin algo ‘in place’ y nos no tine”, Fun A Fat a bisa.
El a splica cu enberdad tur hende kier fruta y berdura mas barata, pero ora barco ta bin e productonan local no ta haya e espacio cu ta suppose nan mester tin.
“Mi ta kere cu e otro banda di comercio tambe mester sostene y duna nos e espacio pa trece nos productonan na mercado, manera Bonaire si ta haci”, el a remarca.
Si no logra algo e aña aki, lo tin consecuencianan pa Aruba. Fun A Fat a señala cu mester wak tur loke ta pasando na California, y a caba di sali den noticia cu 60% di e crop a wordo daña. Si Aruba no haci nada lo por wak un scarcedad grandi di producto y prijs ta bay sigui subi. “Pero nos no ta bay sinta man cruza man cruza pa mucho mas, asina sin mas. Aworaki nos ta duna espacio pasobra a puntra pa haci esey, y nos ta cumpli cune, pero nos kier wak un solucion”. Asina Fun A Fat, miembro di United Farmers Aruba, a conclui.
