Segun Francis Saladin di CUA:
ORANJESTAD (AAN) – Siguiendo cu e entrevista cu Francis Saladin, miembro di Comerciantenan Uni Aruba (CUA), el a bisa cu semper CUA ta reclama gobierno cu nan kier haci cosnan den pura, y semper nan ta bisa cu nan a sinta cu comerciantenan, cu gremio, locual ta berdad, pero gewoon nan ta sinta bisa nan kico gobierno ta bay haci, y ta pretende cu lo tuma conseho di nan, pero nan wak kico nan a duna conseho y kico gobierno a bin ta haci, tin un diferencia grandi den e conseho y loke gobierno ta ehecuta.
Saladin a reitera cu pesey nan ta pidi gobierno pa publica e lista di e mas di 600 productonan cu invoerrechten a baha pa henter pueblo, pasobra cu tin mas di 600 producto pero nan no sa kico ta papia di dje, claramente ta un forma di crea confusion y tilda comercio di subi prijs mientras no den tur caso ta asina.
Segun e comerciante hopi hende ta yama CUA preocupa y un problema grandi cu nan tin ta cu nan no tin confianza den Departamento di Impuesto (DIMP), con nan ta bay maneha esaki. “Nos tin miedo cu nan ta bay coi e placa ey pa haci otro cos cune, y no devolve bek. Nan ta bisa hopi cos, pero nos tur sa cu un vez cu Departamento di Impuesto haya bo placa pa bo haye bek, ta un caminda di cruz bo tin cu cana.
Te ora nan no demostra cu nos por tin e confianza ey di nan, bo ta keda cu un incertidumbre di parti di comercio, pa tur e impuestonan cu bo ta paga adelanta. E ta spera cu pronto lo tin un reunion entre comercio y gobierno awo cu nos ta na Augustus caba, pasobra na Juli di un forma of otro, tur hende ta baha cu vacancy. Awo atrobe ta calmo y ta ora pa nos sinta papia con ta bay soluciona e situacion”, Saladin a remarca.
