Sharon Meijer di Exprodesk:
ORANJESTAD (AAN) – Señora Sharon Meijer, di Exprodesk, den entrevista cu DIARIO a extende un invitacion na tur comerciante di Aruba, pa bishita e evento “Agro-alimentaria 2025”.
Departamento di Asuntonan Economico y su unidad Exprodesk, den colaboracion cu Consul General di Republica Dominicana na Aruba, representa pa señor Luis Elunid Perez y Vice-Consul señor Moises Sanchez Manzueta, ta haci e invitacion aki na tur comerciante di Aruba, cu kier bay Republica Dominicana, como cumprador of importado di productonan agro-alimentario.
E mision comercial aki, ta organiza pa Pro-Dominicana y e Hunta Empresarial Dominicana, y e ta tuma lugar di 28 pa 31 di Mei venidero.
“E lo ta e plataforma mas grandi cu Republica Dominicana tin, pa loke ta e sector agro-alimentaria, bebida y tabaco. E lo reuni mas di 250 exportador Dominicano. Durante e feria, lo tin presentacion di productonan manera berdura, fruta, condimentonan, pasta, coffie, cacao, tabaco, cervez, rum dominicano, y hopi mas. Esaki ta djis pa nos menciona algun. Pero e parti hopi interesante pa nos negoshinan local lo ta cu e ‘trade mission aki’ lo trece un pakete cu beneficionan. Pues, e pakete aki lo ta gratis pa esnan cu ta participa”, Sharon Meijer a menciona. El a agrega cu e parti hopi interesante pa Aruba su negociantenan cu ta bayendo como cumprador lo por spera participacion, completamente gratis tambe, den e “Business round 1 on 1 be to be” cu bendedornan di Republica Dominicana, acceso na exhibicion di productonan local di e pais, un agenda personaliza di e productonan y servicionan local, tambe nan lo haya un aplicacion digital, unda nan por wak e paginanan di tur e citanan di be to be, acceso na panelistanan y conferencianan di varios sector comercial. Nan lo tin guia y support durante tur e dianan aki di Pro Dominicana y su staf, y un parti tambe interesante ta cu nan ta bay tin estadia di tres anochi na “Dominican Fiesta Hotel” Esakinan ta e anochinan di 28, 29 y 30. Y tambe transporte di aeropuerto pa hotel y di hotel pa aeropuerto. Tambe nan lo wordo invita pa e VIP Noche Dominicana Cocktail y Dancing. Ademas lo tin invitacion di Embahada Hulandes na Republica Dominicana, pa e grupo comercial cu ta bayendo Republica Dominicana.
