SANTO DOMINGO: Prijs di mayoria di producto a subi na Republica Dominicana, y comerciantenan ta pensa cu tur esaki no tin hustificacion pe.
Consumidornan ta mira cu e productonan aki di e canasta basico, ta subiendo drasticamente di prijs. Sinembargo e comerciantenan mes ta mustra cu nan ta obliga di hisa prijs, como cu nan mes ta hayando nan ya caba na un prijs nunca antes bisto.
Pesey awor ta e comerciantenan tambe a cuminza keha, cu tur producto ta subiendo di prijs. Loke mas ta halando atencion, ta e prijs di lechi liquido, prijs di lechi na puiro, aroz, azeta dushi, y otro productonan.
Loke toch a baha di prijs un tiki na Republica Dominicana ta berdura y fruta. Prijs di broccoli, selder, cauliflower, comcomber chines, kool, bonchi preto, wortel, y tomati ta loke a baha den prijs.
Prijs di aroz produci na Republica Dominicana ta bayendo halto, y esaki a bin ta socede prome cu December 2021 a cuminza. Prijs di aroz importa di Merca ta wordo bendi aworaki mas barata compara cu esun local.
Algo cu si ta dal duro ta e aumento drastico di prijs di azeta dushi. Den menos di un luna esaki a sorprende tur hende cu aumento. Tambe ta mirando subida den prijs di ketchup, y tomati den bleki na Republica Dominicana.
Prijs di bonchi cora tambe a subi na Republica Dominicana e ultimo tres lunanan. Prijs di bonchi preto sinembargo a keda mescos. Otro productonan cu a subi di prijs ta boternan di mayonnaise. Prijs di galiña ta kedando mescos, y carni di baca tin djis un tiki variacion den prijs. Pero carni di porco si a conoce subida na e pais.
