Meverly Romano, vocero di DIMP a splica: --- ORANJESTAD (AAN): Ta importante pa e comerciantenan chikito, cu tin un eenmanszaak, sa cu nan por bin na remarca pa cay bao di e areglo fiscal cu yama KOR.
KOR ta regla den ley y ta exonera e comerciante chikito cu tin un volumen di benta di menos di 84 mil florin pa aña di paga BBO, BAVP y BAZV.
Segun Meverly Romano, vocero di Departamento di Impuesto (DIMP), pa esaki ta importante pa e comerciante tin un bon administracion pasobra na final di aña, nan lo mester haci un 'jaar aangifte'. Nan lo mester entrega un declaracion riba kico tabata nan 'omzet' (volumen di benta) di henter aña, esta di Januari te cu December.
Esey ta un di e condicionnan di e ley unda cu e persona durante henter e aña no ta paga BBO, no tin mester di haci declaracion tampoco, e ta wordo exonera di e deber eynan, pero na final di aña, e mester entrega un declaracion anual caminda e ta indica cu durante aña 2021, por ehempel, su 'omzet' total tabata tanto cen, a bisa.
E ora, Inspecteur ta bay wak si e persona aki a yega 84 mil florin, cual ta e suma maximo di e exoneracion, of si el a keda surpasa e suma aki pa aña. Si dado momento e comerciante a keda bao di 84 mil florin, automaticamente e ta keda cu su status di KOR pa e siguiente aña.
E peticion pa haya KOR ta wordo haci un biaha, segun Romano. DIMP ta studia si e comerciante ta cumpli cu e condicionnan y na final di aña, e ultimo condicion cu e tin cu cumpli cu ne ta entrega su 'jaar aangifte' y e ora DIMP ta bay wak kico e volumen di benta total tabata durante e aña cu a pasa, Meverly Romano a indica.
A agrega cu si acaso e comerciante a surpasa e 84 mil florin pa aña, por ehempel, si el a cera aña cu 90 mil florin di benta, e ora DIMP ta bay cobr'e riba e 6 mil florin di diferencia. E comerciante ta wordo exonera pa e prome 84 mil florin, pero pa e suma cu el a surpasa ta bay cobr'e extra, kiermen un cobransa adicional.
E PR di DIMP a laga sa cu e comerciante, den un caso cu surpasa e 84 mil florin no lo haya boet, pero ta cobr'e BBO riba e diferencia.
E consecuencia ta cu un bes cu e empresa ta surpasa e 84 mil florin, DIMP ta cobr'e riba e diferencia y no ta haya boet, pero e ta perde su status di KOR pa e siguiente aña. Automaticamente su status di exonera ta caduca pa e siguiente aña y esey ta implica cu tur luna e lo mester haci declaracion di BBO y haci e pago tambe corespondiente.
Romano a enfatisa esaki toch ta un desaroyo positivo pasobra apesar cu tin cu paga e impuesto, e ora ya caba e negoshi ta generando suficiente entrada cu e por cumpli cu e debernan fiscal.
