ORANJESTAD (AAN): E ta un video cu mensahe di Pasco cu e compania NV Elmar a produci den cuadro di nan di 75 aña existencia.
E video ta circulando riba social media, y tambe ta pasa na TV.
En general, e ta un videoclip magistralmente produci, edita, y cu colornan briyante y sin ningun eror ta ser treci riba pantaya den High-Definition. E ta 2 minuut y 48 seconde largo, pues pa casi 3 minuut e televidente ta keda geplak dilanti e pantaya pa mira e produccion aki cu sigur ta un di e top di fin di aña 2025 na Aruba.
NV Elmar a titula e jingle aki di fin di aña 2025 como ‘Iluminando Aruba’. E mensahe ta: “Iluminando Aruba cu alegria y cu amor, nos ta contento, cubo, cu tur, nos curason luz ta briya den cada hogar, ta briya cu emocion, ta trece nos mas cerca, di amor y felicidad.”. Nan a pone e aniversario di nan tambe den e melodia, cantando: “Setenta y cinco aña di trabao y dedicacion, ta sirbi Aruba, cu hopi amor”.
Grabacionnan completamente stabil haci na pia di sero di Hooiberg, tambe nan Hardin di Luz na nan sucursal den Wilhelminastraat, y por a mira nan mascota ‘Chispito’ tambe ta cantando den e video aki. E empleadonan di berdad a presenta den tur nan splendor, ta balia, bisti den forma trendy, y mustrando pueblo con orguyoso nan ta pa ta iluminando Aruba caba pa 75 aña. Pabien na tur esnan cu a bin cu e idea, e crew di produccion, edicion, composicion y areglo di e cancion, y na final pa e fenomenal mensahe aki. Un di e topnan di 2025, sigur!
