Charisse Hoen-Daly di Universidad di Aruba:
ORANJESTAD (AAN): Universidad di Aruba, hunto cu 11 scolnan colaborador na Hulanda, ta invita studiantenan, mayornan y publico en general na College Fair 2026. Esaki lo tuma luga dianan 13 y 14 di november na Renaissance Convention Center, di 11:00 di mainta pa 6:00 di atardi.
Den un entrevista recien, coordinador di Asuntonan Estudiantil di Universidad di Aruba, Charisse Hoen-Daly, a destaca cu institucionnan di enseñansa na Hulanda, Corsou, Boneiro y Aruba tin como meta pa fortalece nan colaboracion pa yuda studiantenan prepara miho pa e siguiente etapa di nan formacion.
E aña aki, College Fair lo dedica atencion special na e escogencia di estudio y e decisionnan cu studiantenan, hunto cu nan mayornan, mester tuma. E orientacion ta particularmente balioso pa esnan cu ainda no ta sigur cua estudio nan kier sigui of na unda nan kier bay studia.
Hoen-Daly a subraya cu ta esencial pa ricibi informacion adecua prome cu tuma un decision cu tin un impacto asina grandi riba futuro di un studiante. Sea cu e escogencia ta cay riba Hulanda, un otro pais den region of Aruba mes, ta importante pa evalua e posibilidadnan di estudio y e gastonan cu nan lo mester paga bek despues cu nan caba nan estudio.
El a enfatisa tambe e importancia di participacion di mayornan na e College Fair. Door di informa nan mes hunto cu nan yiunan, nan por ofrece un sosten mas efectivo durante e proceso di orientacion y escogencia.
College Fair 2026 ta ofrece un oportunidad pa studiantenan y mayornan haya informacion riba nan preguntanan, explora e opcionnan disponibel y tuma un decision bon informa tocante e estudio y destinacion cu ta pas cu e interesnan y metanan di e studiante.
