Señor, Hans Lobach, coordinador y hefe di departamento na RIVM
ORANJESTAD (AAN) – Cooperacion regional y comparticion di conocemento tabata entre e temanan central durante e conferencia anual DuCaPHEN 2026, cu e siman aki ta reuni expertonan, profesionalnan medico y lidernan di salud publico di Caribe Hulandes y Reino Hulandes na Aruba.
Durante un entrevista cu DIARIO, señor, Hans Lobach, coordinador y hefe di departamento na RIVM (Rijksinstituut voor Volksgezondheid en Milieu), cu ta enfoca riba coordinacion y preparacion den area di salud publico y malesanan infectuoso, a enfatisa cu colaboracion continuo entre e paisnan y islanan den e region ta fundamental pa por enfrenta e retonan actual y futuro den salud publico.
“Ta hopi importante cu nos por sigui traha hunto. No solamente riba malesanan infectuoso, unda nos a colabora pa mas cu dies aña, pero tambe riba henter area di salud publico. Hunto nos ta mucho mas fuerte cu cualkier isla of pais individualmente lo por ta. Tin hopi problema cu nos por enfrenta hunto, cu ta mucho mas dificil pa enfrenta nan individualmente,” Lobach a declara.
Segun el a menciona, un di e motibonan principal pa mantene y fortalece cooperacion ta e limitacionnan cu diferente pais y islanan tin den termino di capacidad, recurso y infrastructura.
El a splica cu precisamente p’esey sosten tecnico, comparti conocemento y asistencia profesional ta un elemento esencial den e relacion entre RIVM y e autoridadnan local di salud.
“Tin biaha tin preguntanan tecnico of solucionnan specifico cu mester wordo desaroya. Den e caso ey nos por brinda apoyo y experticio unda esaki ta necesario,” el a bisa.
Lobach a indica cu e prioridadnan pa e añanan binidero ta concentra riba fortalecemento di conocemento, capacidad institucional y infrastructura. El a enfatisa cu no necesariamente tur pais mester aplica mesun reglanan, pero cu ta importante pa nan traha segun metodonan similar.
“Si cada pais of isla ta haci cosnan completamente diferente, cooperacion ta bira hopi mas dificil. Ora nos ta uza metodonan comparabel, nos por siña mas lihe di otro, comparti experencia y hasta tuma over cierto tarea ora esaki ta necesario,” el a splica.
Segun Lobach, esaki ta particularmente importante den caso di brote of emergencia di salud publico, pasobra malesanan infectuoso no ta para na frontera.
“Un brote grandi casi nunca ta keda limita na un solo isla. Normalmente e ta afecta varios teritorio. P’esey nos mester sigui pensa y actua como un region.”
Referente na Aruba, Lobach a expresa su admiracion pa e progreso cu Aruba a demostra durante e ultimo añanan. “Mi ta extremadamente orguyoso di con Aruba a maneha su rol den e cooperacion aki. Aruba ta un di e pioneronan den e area aki y mi ta hopi contento cu nos por reuni aki durante DuCaPHEN 2026.”
El a agrega cu e conferencia lo sirbi tambe como un oportunidad pa identifica area adicional unda sosten y colaboracion por wordo fortalece. “Mi ta spera cu na final di e siman mi lo tin un bista ainda mas cla riba unda nos por sigui yuda y fortalece Aruba y e region.”
