Credibilidad di Aruba den un tempo cu inversion ta clave --- *Creacion debe nacional a descualifica Aruba como autonomo --- *Evelyn Wever-Croes a habri porta pa stabilidad y recuperacion
ORANJESTAD (AAN)- A tuma basta tempo, pero finalmente Reino por prepara su mes pa formilisacion di COHO.
Momento tambe pa DIARIO bay mas den profundidad di loke COHO ta encera y kico e lo nifica pa Aruba den e futuro mas cercano.
Pa atende cu COHO, mester bolbe na e relacionnan den Reino hancra den Statuut, un formula unico pa a termina e era colonial si tur partner den Reino cumpli cu loke Statuut ta encera.
Statuut hamas por wordo considera como un relacion colonial. Statuut ta regla e relacionnan entre e paisnan den Reino, cu ta paisnan autonomo y partner igual.
Loke no ta autonomo den Reino ta asunto cu ta trata e nacionalidad, cu ta Hulandes na tur parti di Reino, defensa cu ta mara na teritorionan di Reino na cual tur pais ta participa, representacion den exterior cu tambe ta mara na e bandera di Reino.
E forma cu Statuut ta atende cu autonomia, no ta laga lugar na duda di loke ta “autonomia” cu ta exigi pa na un forma independiente di otro, un pais por regla su asuntonan basico.
Ora papia di independencia di e ser humano, ta papia di e edad cu hende ta capaz pa para riba su propio pianan, percura pa su mes sin subsidio regla di otro hende.
Por ehempel, pensioen di behez ta duna e hende di edad avansa placa pa e por cubri su gastonan basico cu e no por paga mas.
Huerfanonan y viudanan ta haya asistencia den un sistema cu ta duna sosten financiero tambe na personanan cu no tin entrada y sigur personanan cu no por tin nan propio entrada.
E solidaridad aki ta bini dilanti den Statuut, cu ta papia di independencia financiero di tur e partnernan igual, cu sinembargo, por haya asistencia..
Pa yuda su teritorionan, Hulanda a conoce diferente tipo di proyecto cu cual e paisnan por a traha riba nan infrastructura.
Ora Hulanda a wordo azota pa brutalidad di lama, el a haya asistencia y durante guera Princesa Juliana a expresa e sentido di ta porfin na teritorio Hulandes na momento cu Alemania tabata tin Hulanda ocupa.
Ta pa evita situacionnan manera a desaroya awor, Hulanda a exigi pa su teritorionan den Caribe tin un base economico prome cu nan a cuminsa papia di autonomia, cu colonianan Hulandes na Oriente a haya.
Ora Hulanda a yega Aruba na 2014, e hecho cu Mike Eman mester a bandona Fort Zoutman pa scucha loke Hulanda a bini pa bisa, a confirma cu ya Aruba a wordo descualifica como pais autonomo.
For di 2014 e asunto aki ta na disputa cu tur resultado cu e tin den exterior tambe pa Aruba.
No mester lubida cu e impresion internacional di Aruba tabata mara na e seguridad di e pasaporte Hulandes, leynan Hulandes cu tabata e base pa entre otro comercio, e nivel halto di educacion y di bida na e pais.
Un pakete importante cu a sostene turismo na Aruba tambe.
Inversionistanan sigur ta busca paisnan solido, mas cu nunca den e situacion mundial actual pero tambe den e region caminda Aruba ta situa y ta conoci pa instabilidad politico.
Inversionistanan pero tambe profesionalnan ta analisa cifranan di un pais. Cifranan di Aruba entre 2010 pa 2018 tabata catastrofe.
Na 2010 baha BBO a nifica cu Aruba a aumenta su debe cu 100 Miyon, sin resultado pa Pueblo di Aruba.
Aruba a drenta un situacion cu ta comparabel cu e situacion di Venezuela, cu den un tempo record a destrui Bolivar cu no bal nada mas.
Awor Aruba ta subi un caminda nobo. Hulanda ta duna Aruba asistencia di placa pero tambe di capacidad pa trece un cambio den e situacion financiero cu lo nifica stabilidad.
Paso a paso DIARIO lo bay splica kico por spera di un situacion, caminda ta atende cu e problema na su raiz.
Conocedor di leynan cu ta dicidi pa bon gobernacion, DIARIO ta aplaudi e hecho cu Prome Ministro Evelyn Wever-Croes no a midi popularidad politico, pero a admiti cu Aruba mester di yudansa, sin deshaci di e derechonan mas sagrado.
Asina Aruba ta haya oportunidad pa subi e caminda di recuperacion, cu sosten riba tur tereno di Hulanda y alcansa autonomia real cu ta garantia pa generacionnan nobo!
