Sumanan mas cu doble di luna pasa: --- ORANJESTAD (AAN) –Tin tres hecho real cu ta afecta mayoria di ciudadano den e comunidad di Aruba:
FASE a stop, Loonsubsidie ta bay stop, hopi hende sin trabao, y por pone acerca cu costo di bida ta impagable pa hopi consumidor y, pa colmo, un aumento substancial den prijs di gasoline.
Na mesa di redaccion di DIARIO a drenta reaccion di algun consumidor, cu a haya un cobranza di coriente y di awa excesivamente halto. Den un bario residencial, tres bisiña a bay puntra otro si nan a haya e cobranza di ELMAR y WEB, y a resulta cu den tur tres caso e suma a bin mas cu doble di loke nan a paga luna pasa, cu ya caba tabata basta pica!
Di sumanan di entre 225 pa 250 florin e biaha aki a bin entre 535 pa 550 florin! E consumo ta mesun cos. E personanan concerni a yama ELMAR, y nan a sali cu e excuse cu ta pa motibo di calor cu hende ta gasta mas airco, siendo cu ta famianan cu tin yiunan den edad escolar cu henter mainta no ta na cas, cu nan mayornan cu ta traha sea mitad dia of e dia completo. Ademas te anochi entre 9 cu 10 or nan ta cende airco. Encuanto cobranza di awa esaki a bin pa casi 300 florin, mientras cu te luna pasa nan a paga 200 florin, pero e structura pa laba paña no a cambia, incluso tin hende cu ta hiba paña na lavanderia. Con por ta anto?
Y algo mas straño ainda, un famia cu tabata afo pa, practicamente un luna cu vacacion, a haya e cobranza cu mester paga 14 di December cu un suma di 400 y pico florin! Un luz led nan tin den e cura patras di e cas y otro na entrada di e cas. Un frishider cu logicamente a keda cendi, y nada otro cu por aumenta e gasto di electricidad.
