El a fayece na edad di 95 aña...
*Lo record'e como un cabayero humilde, curioso y semper dispuesto pa comparti conocemento
ORANJESTAD (AAN): Aruba a perde un di su cronistanan y autornan mas prolifico. Clyde Harms a fayece na edad di 95 aña, despues cu su estado di salud a deteriora pocopoco den e ultimo añanan. Cu su partida, nos isla ta dispidi un homber cu a dedica gran parti di su bida na documenta historia, cultura y memoria colectivo di Aruba, lagando un legado literario y periodistico cu lo sigui sirbi como fuente di consulta pa generacionnan futuro.
Pa hopi lector, Clyde Harms tabata un nomber familiar den prensa local. Durante mas di 15 aña el a publica mas cu 100 articulo na Papiamento y Ingles, a trata un gran variedad di tema social, historico, cultural, deportivo, infrastructural y gubernamental. Su articulonan no solamente a informa, sino tambe a preserva historia y testimonio cu otro manera por a perde den paso di tempo.
Harms a cuminsa su carera di escritor desde hoben, ora e, hunto cu algun otro studiante di Julianaschool, a publica den e corant De Poort. Cu paso di añanan, su pasion pa investiga y conta historia a bira un mision personal. Entre 2001 y 2011 el a contribui regularmente na ingles na El Sol Naciente, mientras cu su articulonan den otro medio di comunicacion a logra un amplio publico.
Como autor, Clyde Harms ta laga varios publicacion importante. Entre nan ta Historia di Baseball di Aruba, un obra cu a realisa hunto cu Efraim “Boei” Brion y Don Juan Perez, y German U-Boat 156 Brought War to Aruba February 16, 1942, un investigacion profundo riba e atake Aleman contra Aruba durante Segunda Guera Mundial. Na 2009 el a presenta Storianan di un Mucha di Lagoen, obra cu despues a wordo amplia y publica den forma di buki na 2013. Tambe el a documenta su experiencianan na Libia den Un Arubiano na Libia, relatando su añanan di trabou entre 1966 y 1973.
Su trayecto profesional tabata asina amplio como fascinante. Como ingeniero electrico el a traha na diferente pais pa compania Exxon, incluyendo Venezuela, Libia, Saudi Arabia, Grecia, Reino Uni y Canada, acumulando experiencia internacional cu despues a converti den relatonan di gran balor historico y humano.
Periodista Benjamin Romero, den e prologo di ultimo buki, presenta na October 2025, E Bahul di Clyde, a describi Harms como “un excelente cronista cu un memoria prodigioso”, resaltando cu su obra ta ofrece un relato unico di acontecimentonan historico y cultural di Aruba. Segun Romero, e compilacion di su articulonan ta representa “un legado di hopi balor pa nos pais” y un fuente importante pa investigado y historiadornan.
Ademas di su labor como escritor, Harms tabata profundamente comprometi cu comunidad. El a desempeña un papel activo den Aruba Scholarship Foundation, unda el a sirbi como presidente pa casi 27 aña, y tambe den Rode Kruis Aruba, como secretario durante seis aña. Su dedicacion na educacion, boluntariado y desaroyo comunitario a caracterisa su bida.
Esnan cu a conoce Clyde lo record'e como un cabayero humilde, curioso y semper dispuesto pa comparti conocemento. Su articulonan tabata basa riba investigacion serio, memoria personal y un profundo amor pa Aruba y su pueblo.
Cu su fayecemento, Aruba no solamente ta perde un colaborado fiel di prensa, sino un guardian di nos memoria colectivo. Su pen a documenta personahe, evento y momentonan cu a forma parti di nos identidad nacional, convirtiendo historia den relato accesibel pa tur hende.
Clyde Harms ta laga atras un legado cu dificilmente por wordo iguala. Su buki, su articulonan y su compromiso cu berdad historico lo sigui inspira investigado, periodista y lectornan durante hopi aña. Su bos a keda keto, pero su obra lo sigui papia pa e generacionnan cu ta bin despues.
Na luna di juni di e aña aki, Clyde Harms a celebra su cumpleaño number 95 hunto cu su esposa Milagro, cu kende a casa na 2025, cu famia y amistadnan, rondona di e mesun gratitud cu a caracterisa henter su bida. Cu humildad y un sonrisa, e tabata bisa cu su mayor bendicion tabata un bida largo dedica na famia, comunidad y Aruba. Drumi dushi Clyde.
Riba potret, por mira algun di e articulonan cu tabata publica den DIARIO bao di e nomber Skina di Clyde. Tambe por wak algun imagen di october ultimo, ora el a lansa su ultimo buki: E baul di Clyde.
{gallery}Clyde Harms ta laga un legado valioso den historia, cultura y periodismo di Aruba{/gallery}
