Club Visage tabata un nightclub masha notorio y sumamente popular den su era. E club tabata situa ariba LG Smith Boulevard schuin dilanti di Bushiri Hotel.
E doñonan di e club tabata e rumannan Cuntreras, Paolo y Guiseppe Cuntreras cu na 1985 a haya un permiso pa habri un club.
E rumannan a traha e club y a traha tambe Gaspare Pizza, dedica na un otro ruman Gaspare Cuntreras.
E di dos doño ta Ron Van Keanel cu a converti e club den esun di mas popular y grandi di Aruba. Hopi storia di Club Visage tanto den casnan di Aruba y archivonan di husticia.
Un lugar cu tur dia di siman tabata conoci pa lugar di ambiente tanto paden di e lugar y pafor di e establecimento. Mode shows, eleccion di reina, bandanan internacional a toca den Club Visage.
Na 28 October (1995 )un diasabra atardi Club Visage ta bira e centro di atencion di Aruba. Esaki ta pa e ultimo biaha.
Un candela ta cuminsa den deposito patras di Club Visage y ta extende na Certified Supermarket, ta expande rapido pa El Patio restaurant, Club Visage y Codemsa Building Materials.
Unidadnan di Brandweer di Aruba cu ekipo pisa hunto cu esun di Refineria Coastal no por a domina e candela.
Club Visage a pasa pa historia pero tambe El Patio restaurant, Codemsa Building Materials y Certified Supermarket a sucumbi den e candela.
Awe e lugar exacto unda Club Visage tabata ubica ta espacio pa para auto. Nunca mas a traha un edificio na e sitio aki.
Compila pa Roberto Croes
Nos Historia Nos Herencia
