Marceylaine Paskel di DAS:
- Lo no tin consecuencia pa personanan cu ta biaha pa salud cu AZV
ORANJESTAD (AAN): Departamento di Asuntonan Social (DAS) ta enfatisa cu tur cliente cu ta ricibi sosten financiero tin obligacion di informa e departamento di cualkier cambio den nan situacion personal. Esaki ta inclui, entre otro, cambio di direccion, famia y tambe biahamento.
Relacionista Publico di DAS a splica cu e proceso ta facil, ya cu e informacion por wordo entrega via WhatsApp, e-mail of personalmente na oficina di DAS.
Segun e, e departamento ta informa tur cliente tocante nan obligacionnan mientras nan ta ricibi y pa mantene nan sosten financiero.
Sinembargo, si un cliente no reporta un cambio y e departamento descubri e informacion posteriormente, esaki por tin consecuencia pa e bijstand cu e cliente ta ricibi. El a enfatisa cu DAS ta busca pa preveni situacionnan asina y, pa e motibo ey, ta encurasha tur cliente pa comunica cualkier cambio na tempo.
Paskel a remarca cu e sosten financiero ta un servicio regula pa ley y cu tin diferente rekisitonan cu DAS mester aplica tambe. P'esey DAS ta pidi tur cliente cu, si tin un cambio den nan situacion, pa informa e departamento.
Tocante biahamento, el a splica cu, conforme Landsbesluit di 1988, no. 88, articulo 14, lid 1, un beneficiario di sosten financiero por permanece afo di Aruba pa un periodo maximo di cuatro siman. Si e periodo aki wordo sobrepasa, esaki por tin consecuencianan riba sosten financiero. P'esey, ta importante pa e cliente informa DAS prome cu e biaha.
Pa clientenan cu ta biaha pa motibonan medico bou di cobertura di AZV, tin un procedura aparte. Den e caso aki, e biahamento no tin consecuencia pa e sosten financiero, pero e cliente igualmente tin obligacion di notifica e departamento prome.
