Parlamentario Guedez-Erasmus ta contento
ORANJESTAD (AAN): Recientemente Minister Dangui Oduber a anuncia e realisacion di e mocion “construi un man di sosten na trapi di Hooiberg”. Durante e reunion publico di dia 24 di november 2022 Parlamento di Aruba, a trata e presupuesto pa aña 2022 di e Tourism Product Enhancement Fund (TPEF). TPEF ta un fondo estableci pa eleva e producto turistico Aruba, na unda entre otro e proyecto embeyecemento di sero di Hooiberg.
Segun Darlaine Guedez-Erasmus di MEP, durante e reunion aki el a entrega un mocion tocante e proyecto di Hooiberg, caminda el a pidi Gobierno di Aruba pa construi un man di sosten. Di e manera aki nos local- y turistanan adulto mayor lo por subi e sero di Hooiberg na un manera mas sigur.
Tur hende por mira e lugar aki como un atraccion turistico pero tambe un luga, specialmente bou di nos localnan, pa haci actividad fisico. Di e forma aki tur persona por participa y disfruta di e naturalesa na e sero di Hooiberg. Pasobra sin duda e sero di Hooiberg ta un icono.
“Mi kier gradici Minister Dangui Oduber pa su atencion duna na mi mocion y realisacion di e man di sosten na e trapi di sero di Hooiberg, cu por cierto a keda hopi bunita. Mi ta contento di mira e bon reaccion di e pueblo tambe pa cu e realisacion aki, paso manera e comentarionan ta, "awo SI mi lo por subi e sero di Hooiberg”.
