Director Roy Lacle di City Inspector
ORANJESTAD (AAN): Director di Bureau City Inspector (BCI), señor Roy Lacle den un entrevista recien a duna di conoce cu ciudadanonan a cuminsa sinti e necesidad pa alomenos tene rond di nan mes propiedadnan limpi, cua tabata e intencion di gobierno tambe pa haci posibel pa deshaci di sushi gratis.
Tambe, segun e, hopi ciudadano a bira mas consciente di otronan cu ta tira sushi na luganan ilegal, nan ta saca potret di e situacion y si por di number di auto y ta manda BCI. Sinembargo, segun el a duna di conoce ainda tin hopi hende ta tira sushi rond, door di flohesa pa hiba nan na e luga destina cu ta gratis.
Riba e pregunta si gobierno tin plan pa pone camaradi vigilancia na cierto areanan, el a menciona cu Gobierno Wever-Croes, bou maneho di ex minister Ursell Arends, tawatin plan riba mesa pa pone camaranan. Esaki nunca a wordo concretisa. Tambe e departamento a hiba conbersacionnan cu Ministerio Publico. Tira sushi den areanan no destina, ta un acto castigabel, y na momento cu un ciudadano wordo gara ta tira sushi of tin evidencia riba potret of camara di esaki, por traha un procesverbal y e personanan culpabel ta haya boet. E plan aki tampoco a wordo concretisa.
Mientras tanto, señor Lacle a duna di conoce cu, e departamento a haya situacionnan na unda ciudadanonan ta manda prueba di otronan cu ta benta sushi afo den luganan ilegal, y nan ta bishita e ciudadanonan aki y obliga nan di lanta e sushi bek. El a enfatisa cu ta deber moral di cada ciudadano pa tene nos isla limpi, tanto pa nos mes pero sigur tambe pa mustra nos bishitantenan, cu ta nos pan di cada dia, cu nos por tene nos isla limpi.
