ORANJESTAD (AAN): Un señora a indica na DIARIO, cu e ta spera cu ainda pa lunanan venidero lo por tende un tiki mas,
di cualkier plan cu tin pa trata na rebiba Caya Principal di Playa.
El a bisa cu e ta hopi contento cu Ministro ta haciendo cos bunita pa San Nicolas, y claro cu tur e artenan visual eynan, e ta great. Pero que hubo di Caya Betico Croes na Playa, cu den pueblo ta conoci como ‘Caya Grandi’?
Net e caya cu ta principal unda turistanan ta cana den dje, no ta wordo menciona ultimo tempo. Segun e lector, nan kier sa kico lo pasa cu nos caya.
Aki e dama ta sugeri, pa Gobierno pidi pueblo pa colabora, y di e forma ey hendenan por presenta cu idea riba loke por wordo haci pa rebiba Caya Betico Croes na Playa.
E ta convenci keto bay, cu aworaki 2022 cu Aruba su ‘Caya Grandi’ ta un lugar bon pa negoshi, y pa hasta hende biba eynan. Pesey a tuma nota cu hasta Universidad di Aruba kier habri ‘dorms’ den Caya Grandi pa e studiantenan di exterior tin un lugar pa keda.
Caya Grandi por haya mas bida, y anochi sigur tin di instala mihor iluminacion compara cu loke tin actualmente. E scuridad actual ta un fayo enorme di ora cu Gobierno anterior a converti Oranjestad y a bestel e luznan cu a laga centro di ciudad bastante scur.
Loke sea, e speranza tey cu pueblo por trece ideanan, pa asina Gobierno mira cu tin di haci di Caya Grandi, un ‘algo’ pa e Arubianonan cu ta biba aki, cu mester di un lugar bunita pa bay haci compras, y lugar di sinta pa come y bebe, y no cosnan caro,.
Tin hopi cos cu por haci den caya grandi, pero semper y cuando e tin di socede na un forma transparente, bon structura, bon maneha, y spera cu tin algo pa haci pa drecha e lugar aki y hacie bunita tambe.
“For di profundo di mi curazon, mi ta spera cu algo por wordo haci pa rescata nos Caya Grandi.”
