ORANJESTAD (AAN): Un borchi grandi di propaganda cu pa basta tempo no ta wordo usa mas na e cruzada di De La Sallestraat y Kamerlingh Onnestraat, e siman aki a basha bin abao awor cu biento a bolbe cuminza supla duro.
Autoridadnan a notifica Bureau City Inspector pa bay
check esaki. Y e ta algo cu e funcionarionan di City Inspector a bin ta nota cu ta un trend nada bunita cu tin awor tur rond di e isla.
Hopi borchi di propaganda cu ta birando bieu, ta bira den mal condicion y debi cu e structura di sea palo of di metal ta putri, esaki por bin abao causando daño of hasta laga hende herida.
Ainda DIARIO ta corda den pasado, tempo cu un Ministro di Partido PPA cu tabata den gobierno, e tempo ey a expresa cu e lo kier pa elimina tur borchi di propaganda cu tin rond di Aruba, como cu e ta haci e isla mahos, y ta daña full e bista di paisahe y medio ambiente. Pero su plan no a sigui, y awor ta mira e consecuencia di asina hopi borchi poni rond.
Na e T-Weg di Kamerlingh Onnestraat, Bureau City Inspector a nota cu un di e tubonan cu tin e borchi wanta a kibra y pesey el a bin cay abao.
Vocero Robby Rosel a splica cu nan ta mira cu tin mas borchi rond di Aruba cu no ta wordo usa mas y ta den decadencia. Y peor awor cu tin hopi biento, y tambe un periodo di Horcan cu ta menazante, lo ta bon momento pa e doñonan bay revisa nan borchinan. Si acaso no ta usa nan mas, lo ta prudente pa baha nan abao pa evita situacion similar aki.
Bahando borchi abao, kizas bo por hasta scapa bida di hende. Rosel a splica cu esun mes cu a cay den Kamerlingh Onnestraat, e lo por a causa herida na hendenan si acaso net e momento ey tabatin peaton ta pasando pabao di dje. E doño di cas a priminti City Inspector cu nan mes lo hala kita e borchi di eynan. City Inspector a keda di pasa e siguiente dia pa mira si a kita e borchi y e sushi cu a keda benta riba acera y caminda. Si acaso esey no a socede ainda, e momento ey lo bay duna un boet.
Rosel a admiti cu nan tin varios inspector riba caya cu ta sigui controla borchinan cu ta un menaza pa bin abao. Tambe ta sigui controla sushedad, hendenan cu ta benta sushi unda cu ta, incluyendo areanan di rooi cu ta preferible di ta limpi e dianan aki relaciona cu mal tempo na caminda.
