ORANJESTAD (AAN): Enid de Kort, terapista di pareha y famia, ta un di e tres orador di congreso pa pareha 'Cende e Chispa di bo Relacion',
y el a indica cu e ta hopi contento cu nan a uni forsa pa organisa e congreso aki. El a bisa cu pa hopi aña tin e idea aki riba mesa, pa motibo cu nan tin un preocupacion, pasobra na Aruba tin hopi pareha cu por bay miho cu otro. E cifranan di Departamento Social, di sesion bida y famia, den e top tres di e casonan, den por lo menos ultimo binti aña, ta problema di pareha.
Señora de Kort ta puntra si comunidad di Aruba a yega di para keto con e welonan a comunica cu otro, con e welonan a comunica cu nan yiunan. Sin lubida con nos mayornan a comunica cu otro. E ta kere cu e preguntanan aki ta hopi importante, pasobra sin ta un persona ta consciente, por bay mustra con “nos mes” ta comunica cu pareha, esaki por ta den nos DNA. Na comienso di su charla, e ta bay orienta riba e tema aki. E titulo di su charla ta “E baile nobo den comunicacion”. Esaki ta pa enfoca riba comunicacion entre pareha. Si ta un baile cu ta bay 'smooth' of si continuamente ta trapa riba pia di otro.
Tambe lo trata con pa mehora e comunicacion entre pareha. de Kort a indica cu su charla lo interactua cu publico.
E ta sigur cu e congreso aki ta un comienso nobo. Comision Vision Pedagogico a uni forza cu Departamento di Asuntonan Social, Centro pa Hoben y Famia, Fundacion pa Nos Muchanan, Stichting Wit Gele Kruis, Fundacion Respetami y Tienda di Educacion, pa trece un topico hopi importante y actual. E ta gradici CEDE Aruba pa yuda organiza e congreso y ta invita comunidad pa participa den e congreso cu lo tuma luga dia 3 di september na Renaissance Convention Center di 9'or di mainta te cu 4'or di atardi y ta completamente gratis.
