Thomas Ruiz, Secretario di VRA:
ORANJESTAD (AAN) – Thomas Ruiz, Secretario di Verening Rijscholen Aruba (VRA), a menciona den entrevista cu DIARIO cu na momento di haci un cambio den un sistema di educacion, mester por wak tambe e impacto den e cifranan. Por ehemplo, den rijbewijs mester wak’e den e cifranan di dalmento, di un of otro manera, y tambe den e cifranan di boetnan cu ta wordo parti.
Mester wak si e accidente ta door di hende cu ta den e sistema nobo of e sistema bieu di rijbewijs. Pero si no ta zorg pa colecta e cifranan necesario, Ruiz ta puntra su mes con por planea cosnan, por ehemplo pa bin cu un maneho pa ataca cierto problemanan den trafico. Di con esaki ta asina, Ruiz no por duna prensa un contesta, pero e ta lague pa prensa puntra autoridadnan concerni. Por ehemplo puntra nan kico nan ta pensa di e situacion actual den trafico y kico ta nan plan. Por ehemplo, puntra KPA, KC, of Minister di Husticia. Tambe tin hopi hende cu ta bezig cu trafico, Ruiz a señala, entre nan DTI, di con no tin tanto keur manera mester ta.
“Manera nan mes a bisa nos cu nan tin menos hende pa gekeur pasobra no tin control, handhaving no ta funcionando manera mester ta. KPA ta corto di personal, e forza minimo ta 600 polis y nan tin como 300. Pues, nos tin cu busca un solucion, pero un solucion ta cuminza na sinta na mesa cu tur e stakeholders cu tin di haber cu trafico y dialoga, Mi a bisa esaki hopi, hopi biaha; dialogo ta hopi importante, aworaki un ta pasa riba otro, un no sa di e otro y no por sigui asina”, Thomas Ruiz a acentua.
