ORANJESTAD (AAN) – Covid-19 a bin pa keda? Esaki ta e titulo di un estudio publica recientemente,
despues cu mas di cien cientifico y experto den virus, rond mundo, a wordo entrevista cu e pregunta aki, door di e Revista Cientifico “Nature”.
Tur e cientificonan aki ta opina cu Covid-19 lo no wordo eradica, y cu el a bin pa keda y bira un virus endemic manera e griep of influenza, pa cual tur aña tin vacuna. Muy probablemente esey lo ta e caso pa Covid-19 cu su variantenan.
Manera ta conoci, Covid-19 a infesta mas di 185 miyon di persona y a causa 4 miyon di morto den henter mundo, te aworaki, for di momento cu el a wordo califica como un pandemia door di Organizacion Mundial di Salud (OMS).
No obstante, speranzanan grandi ta existi, cu e vacunacion lo por hiba mundo di regreso na algun sorto di normalidad, y cu lo por alivia e restriccionnan sanitario cu a bin ta diseña bida na un otro manera, durante e ultimo 16 lunanan, cu e virus a plama rond mundo.
E cientificonan, segun e publicacion, ta cada bez mas convenci cu Covid-19 a bin pa keda. Ta na Januari di e aña en curso, cu e revista cientifico “Nature” a puntra mas di cien inmunologo, virologo, y experto den salud rond mundo, si nan ta kere cu Sars-Cov-2 lo por wordo eradica di e faz di tera.
Casi e 90% di e encuestadonan a bisa “NO”. Nan a bisa cu tin evidencia cu probablemente, Covid-19 por converti su mes den un virus endemic y lo continua circulando na mundo. Esaki no ta desconoci pa e cientificonan den e bataya di humanidad contra malesanan en general y contagioso en particular, pero e Covid-19 ta presenta desafionan mucho mas especifico, segun nan analisis y experiencia profesional.
“Nature” a puntra nan –Con ciencia ta predeci cu humanidad tin cu biba cu covid-19 den e siguiente añanan? E cientificonan a pone esun yama “Viruela” como ehemplo di un malesa viral cu a logra eradica pa añanan largo, pero cu den tempo reciente a aparece algun brote, cu por a contene cu vacuna.
Pues, e cientificonan ta mustra cu malesanan contagioso no ta algo cu sosode tur dia. Absolutamente no! De hecho, y te awendia e Organizacion Mundial di Salud (WHO) a declara como eradica solamente dos virus: Viruela y Peste Bovina.
E publicacion cientifico aki, ta sigui splica cu viruela so, considera un afeccion antiguo, a crea epidemianan na lo largo di e historia di humanidad t a causa te 500 miyon di morto durante e siglo XX te su eradicacion na aña 1980, y ta comparable cu e Covid-19 den termino di distribucion geografico y alcance. Pero e desaroyo di e vacuna a corta e transmision di e virus.
David Heymann, profesor di Epidemiologia di malesanan infeccioso di e Scol di Salud y Medicina Tropical di London a splica pa Nature: “Lamentablemente, e vacunanan contra covid-19 desaroya te awo no a logra e mesun efecto di esun di viruela. Den algun caso nan no ta preveni e infeccion, pero ta modifike y yuda pa e malesa bira menos grave. No obstante, e personanan vacuna ainda por transmiti e virus na otronan”.
Lo tin mas articulo tocante e investigacion cientifico aki di e Revista Cientifico Nature.
