TAMPA: E misterio a wordo resolvi! Cientificonan a caba di descubri e fuente di un malesa misterioso cu ta matando Bushi di Lama (conoci como ‘Sea Urchins’) den henter Caribe for di aña pasa.
E potret aki saca na Aruba ta mustra con e Bushi ta perde su spinanan.
Diaranzon 19 di April, e investigadornan a raporta cu un parasito chikito ta culpable pa e morto di e animalnan aquatico aki.
E Bushi di Lama cu spina largo, normalmente ta sconde den rifnan y ta come e alga cu ta crece riba coralnan. Pero na 2022, hopi di e Bushinan aki a cuminza perde nan spina y muri.
Cientificonan di University of South Florida (USF) su College of Marine Science cu sede na St. Petersburg na Florida, hunto cu esnan di Cornell University na New York a hasta bin Aruba pa den lama rond di e isla haci investigacion y saca potret manera esun aki. Nan a saca varios Bushi for di lama pa asina haci investigacion genetico riba nan.
Danki na e investigacion aki, cientifico Mya Breitbart di 45 aña di USF University a descubri cu criaturanan di un solo-cel conoci como ‘cilates’, tabata haci e Bushinan aki malo. E mesun criaturanan aki lo por ta esnan cu a causa un andanza den decada di 1980 cu a mata casi tur Bushi di Lama den e region, aunke cientificonan no por bisa esey cu seguridad.
E team di Mya Breitbart a investiga esaki tambe na Florida Keys unda e Bushinan tambe ta muriendo.
Riba e potret aki suministra pa investigadornan di Cornell University, ta mustra e imagen di un Bushi di Lama cu ta mustra con su spinanan ta cay debi na un parasito. E potret ta saca na Augustus 2022.
E relato di e investigacion aki a sali publica e siman aki den e journal, Science Advances. E potret ta cortesia Ian Hewson/Cornell University.
