Candidatonan eleccion primario Oposicion na November ta sclama
*Un situacion historico, unico y peligroso ta culmina na Venezuela
*Placa produci pa e compania Mericano ta fortalece posicion Maduro
ORANJESTAD(AAN)—Manera ya a wordo participa na lectornan, DIARIO na un forma continuo hunto cu mundo liber ta sigui desaroyonan preocupante pa Venezuela.
Entrada pa October 2023, ta bira un momento di frustracion pa oposicion na Venezuela, cu na diferente forma ta lansa un grito di auxilio na e paisnan liber cu un gobierno democratico.
E situacion cu ta presenta su mes na Venezuela actualmente, pa cual DIARIO a bati alarma algun siman pasa, ta uno di gran preocupacion pa Venezolanonan cu ta mira regreso di normalidad di nan pais y nan regreso na nan pais, bira cada rato mas dificil.
Cu entrada di Presidente Biden na White House, temor grandi a wordo expresa di parti di Miyones di Venezolano cu mester biba for di nan pais pa garantisa nan bida y bienestar.
Refugiado Venezolano sigur na Merca ta un problema hopi serio.
Fin di regimen totalitario di Nicolas Maduro, ta e unico solucion cu mundo liber ta mira pa den retorno di un democracia na Venezuela, e Pueblo di e pais por conoce trankilidad y futuro na nan patria.
Eleccion 2024 ta dicidi pa e Gobierno nobo cu mester sinta na 2025, pero cu segun miedo di un grupo creciente, lo no ta e caso.
Presidente Mericano Joe Biden a busca solucion pa Venezuela den un acuerdo cu e kier a alcansa cu Nicolas Maduro, cu a haci bofon di e intento di e dirigente Mericano, manera e realidad sumamente serio na Venezuela, ta demostra.
Oposicion di Venezuela na October kier tene nan eleccionnan primario pa asina entre otro yega na candidatonan pa presidencia di e pais pero tambe na retorno di democracia y libertad politico cu mester pone fin na represion di Nicolas Maduro.
Na e momentonan aki diferente candidato pa partidonan di Oposicion di Venezuela, ta pidi yudansa internacional pa nan enfrenta desaroyonan politico di Venezuela.
Maria Corina Machado a pidi asistencia di Nacionnan Uni pa garantisa derecho di voto na Venezuela, caminda un compania petrolero di Merca, a provoca un situacion sumamente riesgoso pa futuro di e pais.
E compania Mericano, Chevron, ta wordo sigui dor di periodismo internacional debi na peso di su presencia na Venezuela y e posibilidad grandi cu e ta crea pa Nicolas Maduro haya forsa necesario pa bolbe gana eleccion na Venezuela.
Pa enfrenta e represion politico di Nicolas Maduro y e situacion sumamente doloroso den cual e Pueblo di Venezuela ta biba, Merca a introduci sancionnan contra Venezuela, cu resultado directo pa e industria petrolero di Venezuela.
Na November 2022, Presidente Joe Biden di Merca, a dicidi di deshaci di parti di e medidanan Mericano, den un supuesto acuerdo cu a logra cu Nicolas Maduro pa eleccion liber bira realidad na Venezuela.
E permiso cu Presidente Biden a entrega na Chevron a fortalece e posicion di Nicolas Maduro na Venezuela, caminda awor placa ta lora den e gruponan elitario di gobernacion di Maduro pero no ta alcansa e Pueblo den desesperacion y ansioso pa regreso di democracia.
Maduro a dicidi cu Europa lo no ta observador na e eleccionnan, cu segun tur instancia lo tuma lugar den e prolongacion di dictadura di Maduro, cu na forma directo ta haya sosten di e compania Chevron, cu ta produci placa den e negoshi di petroleo, cu no ta beneficia e Pueblo di Venezuela, pero ta fortalece e regimen di Nicolas Maduro.
Manera DIARIO a adverti, e situacion aki a bira topico na mundo, mientras Oposicion ta prepara pa e eleccionnan primaria di Oposicion.
E contenido di un acuerdo pa Merca suavisa su sancionnan y asina habri porta pa bon resultado ventahoso pa Venezuela cu negoshi den petroleo, tabata rekeri cambio den actitud di Nicolas Maduro, cu ta duna prueba awor cu mundo no por spera ningun cambio cu el a priminti.
E posibilidad pa e compania Mericano, Chevron, pone hopi placa lora na Venezuela, a bira realidad. Pero e placa cu lo lora lo sostene Nicolas Maduro, cu riba plataforma mundial ta wordo considera di a haci bofon di intentonan di Merca pa Venezuela regresa na democracia.
Na October, Oposicion Venezolano lo tene eleccionnan primaria cu ta antesala pa e momento cu un Pueblo liber lo a acudi na urna electoral.
Mundo ta vigila Venezuela, caminda Nicolas Maduro a haci bofon di e intentonan Mericano pa restora democracia.
Mientras Chevron ta produci sumanan halto, e resultado lo beneficia Nicolas Maduro, cu segun tur informacion lo no hala atras pero lo lucha cu alma y curpa pa mantene represion dictatorial na e pais.
Den porta di Aruba, un situacion serio, unico y historico ta desaroya y DIARIO lo sigui informa Aruba.
