ORANJESTAD (AAN): Den cuadro di un fundraising cu Fundacion Mi Cutisa (FMC) ta organisa pa recauda fondo,
principalmente pa por maneha Museo Cas Tan Tin cu ta situa na Pos Abou 19, pa por haya un aporte financiero significante, FMC ta organisa un “Concierto Bailabel di Aña” cu lo tuma luga na Entertainment Center Dakota cu un presentacion di “Doble R Puru” di Corsou hunto cu “Robert y su Solo Banda Show” y “Papito y su Nuevo Sabor”.
A dicidi di organisa un concierto cu Doble R dia 12 di augustus 2022 den combinacion cu “Robert y su Solo Banda Show”, cu ta cumpli 30 aña di existencia e aña aki. Pa completa e espetaculo aki a invita Papito Rafael tambe pa recapitula tur su exitonan hunto cu “Papito y su Nuevo Sabor”.
E tres musiconan aki ta nos legendarionan cu a duna un contribucion significante den desaroyo di musica Antiano den Caribe Hulandes y kendenan a percura pa mantene y traspasa nos musica di tumba, wals, dansa y salsa Antiano riba tur e islanan di habla Papiamento.
Banda di un concierto, FMC na principio a planea pa organisa un charla unda lo bay papia riba trayectoria di e tres musiconan aki. Riba peticion di Robert Jeandor FMC a acerca Ruben Garcia pa tene e charla riba trayectoria di Robert Jeandor y di Papito Rafael.
Lamentablemente, pa motibo di salud, e charla riba e musiconan di Aruba lo no por bay door. Rene Rosalia a acepta e ora pa duna un charla di un ora riba e trayectoria di Reginald “Doble R” Recordino.
Orador Rene Rosalia
Antropologo Rene Rosalia (PhD) for di Corsou a investiga pa hopi aña e trayectoria di Doble R y lo bay tene un charla basa riba un analisis cu el a haci di casi 50 aña di desaroyo musical. E lo ta un presentacion riba e nificacion di e trabou musical y balor literario di Rignald Recordino.
‘Doble R’ a produci mas di 500 composicion cu nos hendenan na Aruba, Boneiro y Corsou, no solamente a disfruta di nan, pero a siña hopi di nan atraves di e mensahenan cu Rignald ta manda den su letranan. E trayectoria di Doble R ta algo cu varios hende ta investiga y analisa.
Entre otro, e aña aki Regnald Recordino mes ta bay bublica un buki di su historia musical y cu e letranan di tur su composicionnan cu el a publica.
Programa dia 10 di augustus 2022
E programa lo ta for di 7:00 pa 9:30 or di anochi. Despues di e charla tin oportunidad pa Dialogo y Pregunta. Lo clausura e presentacion cu un receptie den cura di Universidad di Aruba.
Importancia di e trayectoria y impacto cultural di “Doble R”
Rignald Recordino su composicionnan tin un variacion grandi den su forma di skirbi. Su texto- y topiconan cu e ta usa pa su composicionnan ta tipico di Rignald Recordino. E forma con el bin ta compone su piesanan, particularmente su forma unico di combina tanto instrumento como e forma di canta den e totalidad di un piesa, ta aspectonan completamente inovativo.
Rene Rosalia lo bay amplia mas riba e impacto cu Rignald Recordino tabatin riba nivel social y musical pa tur e tres islanan di habla Papiamento den Caribe Hulandes.
Educacion Cultural
Mirando cu e charla aki ta forma parti di e desaroyo di Educacion Cultural cu lo bay hunga un rol importante riba tereno di cultura mundialmente despues di e pandemia di Covid 19, FMC a acerca Universidad di Aruba pa coopera cu organizacion di e charla aki. Tambe a tuma contacto cu e Secretariado di Comision Nacional di UNESCO y Departamento di Cultura di Aruba.
E perspectiva ta cu e charla aki lo haya e interes di varios musico, pero tambe di hopi fanaticonan di Doble R na Aruba. Tambe pa studiantenan di Universidad di Aruba, di IPA y di EPI e charla aki lo tin un balor agrega riba tereno di investigacion y documentacion. Pa tur hende cu ta gusta musica di e islanan Aruba, Boneiro y Corsou, esaki lo ta un anochi sumamente interesante y educativo.
