Motibo pa sinti orguyo di kico a logra
ORANJESTAD (AAN): Prome Minister mr. Mike Eman a comparti su satisfaccion cu diferente ahuste cu Gobierno a tuma pa fortalece e poder di compra di nos pueblo. Segun e Prome Minister, e inversionnan realisa durante e ultimo periodo no solamente ta representa un sosten financiero pa miles di famia, sino tambe un momento importante pa reflexiona riba e progreso cu Aruba a logra como comunidad.
“E ta un preoccupacion cu mi tin,” Eman a expresa. “Ora nos ta enfrenta momento importante manera esaki, nos mester para un rato y aprecia e esfuerso colectivo cu a haci esaki posibel. Gobierno, prensa y comunidad tur tin un rol pa reconoce e progreso cu nos ta logra.” Prome Minister a subraya cu den hopi ocasion, noticia positivo ta pasa sin hopi atencion, mientras cu e enfoke ta bira rapidamente pa e siguiente reto. Segun Prome Minister Eman, ta importante pa Aruba desaroya un sentimento di gratitud y satisfaccion pa e resultado nan cu ta logra den beneficio di pueblo. “E semper ta bon pa aspira mas, pero nos mester tambe tin gratitud pa loke nos tin y pa loke nos por logra hunto,” Eman a bisa.
E Prome Minister a destaca cu e aumentonan den inversion pa trece mehora den poder di compra si nos pueblo anuncia recientemente ta toca directamente miles di habitante. Entre nan, alrededor di 18 mil persona cu tin salario minimo y cerca di 22 mil pensionado cu a ricibi un aumento significativo den nan entrada. “E ta un momento grandi pa nos hendenan. Si nos mira kico ta pasando den hopi otro pais na mundo, unda e gobiernonan ta recorta asistencia social y reduci sosten na ciudadano, Aruba ta haci e contrario. Nos ta aumentando pension, nos ta fortaleciendo asistencia social y nos ta inverti den poder di compra di nos pueblo,” Eman a declara.
Un di e medidanan menciona ta e aumento di reparatietoeslag, cu lo beneficia trahadornan cu un entrada te cu Afl. 2.500 pa luna. E beneficio ey lo representa un aporte adicional riba nan salario y ta forma parti di e strategia di gobierno pa sostene e grupo cu ta mas vulnerabel na e aumento di costo di bida. Segun Eman, e reaccionnan cu e ta ricibi durante su bishitanan semanal den comunidad ta confirma e impacto positivo di e ahustenan. “Nos ta haya hopi palabra di gratitud. Mi a topa varios pensionado cu ta sumamente contento. Tin hende cu tabatin un pension parcial di alrededor di Afl. 600 y cu awor a ricibi Afl. 500 adicional. E diferencia den nan bida diario ta enorme,” el a relata.
Prome Minister a reconoci cu semper tin espacio pa mehora, pero a enfatisa cu Aruba tin motibo pa sinti orguyo di e nivel di bienestar y proteccion social cu a logra construi. “Nos tin un sistema di salud unda tur hende tin acceso na cuido medico, sin importa e entrada of posicion economico cu nan tin. Si cuido no ta disponibel aki, nos por bay Colombia of Hulanda y e asegurado ta cubri. E ta perfecto? No. Pero practicamente ningun otro pais tin un sistema cu ta cubri su comunidad di e manera aki.” Eman tambe a destaca cu Aruba ta ofrece enseñansa practicamente gratis pa su ciudadano, algo cu segun e Prome Minister ta contribui directamente na igualdad di oportunidad y desaroyo humano.
“Nos mes ta sumamente orguyoso cu nos pais por haci esaki. Historicamente, hopi di e logronan cu nos ta mira awe nunca a tuma luga di e forma aki. Mi kier invita nos tur pa celebra e momentonan aki, aprecia e progreso y sigui traha hunto pa un Aruba aun mas fuerte,” Prome Minister Mike Eman a conclui.
