ORANJESTAD (AAN): Diahuebs atardi ATA a tene un rueda di prensa, relaciona cu Dia Internacional di Turismo cu ta bay ta dia 27 di September.
“E fecha aki ta importante pa nos como Aruba para keto riba esaki”, segun CEO di ATA Ronella Croes.
El a splica cu pa Oficina di Turismo na aña 2014 nan a drenta un etapa nobo conforme e di dos plan di maneho, tendencia mundial y tambe feedback di e stakeholders.
“Esaki a conduci na un evolucion di ATA”.
Desde e momento eynan nos a prioritiza un ATA cu ta duna mas atencion na desaroyo di nos producto turistico na un manera duradero.
Conforme esey nos a haci diferente accion y a tuma diferente paso, entre otro a haci un estudio di capacidad di carga y a conduci un estudio tambe cu ta defini basicamente ki tipo di segmento, ‘niche’ of productonan Aruba por introduci cu ta cuadra cu e vision di un desaroyo riba duradero y tambe kico mas por haci y kico esaki por nifica pa Aruba, segun Croes.
E CEO di ATA a sigui bisa cu un desaroyo turistico duradero ta uno unda cu tin un balanza entre 4 aspecto, esta contribucion economico, proteccion y conservacion di nos medio ambiente, tur cos mester sirbi tambe e calidad di bida di nos residentenan y tur cos mester ta dirigi tambe riba un experiencia di calidad pa nos bishitantenan.
“E 4 componentenan aki ta forma parti di locual nos a introduci e ora eynan na 2014 cu ta un modelo di desaroyo turistico cu nos ta califica como uno di high value/low impact”.
High value por medio di e contribucion economico y cu nos ta trece pa nos residentenan.
Aki no mester pensa solamente den contexto monetario, pero un biba feliz dirigi riba bienestar pa un y tur.
Tambe low impact pa loke ta nos medio ambiente y recursonan natural, segun Croes.
El a sigui bisa cu asina tur cos ta cuadra den e modelo turistico aki.
Locual ATA a lanza Diahuebs ta yama Aruba Signature Experiences y ta cuadra cu e vision splica.
“Pa medio di e partnership di awe nos lo duna un plataforma y oportunidad unico pa esnan cu ta interesa pa gana den sentido di training pero tambe den educacion, di parti di den e caso aki ATA, Credits Aruba y EPI”.
Tambe nos lo bay un tiki mas leu como ATA, unda cu e programa lo brinda diferente oportunidad y e intencion ta cu bao di e plataforma aki lo scoge e 5 mihor ideanan di negoshi y plannan di maneho cu ta cuadra cu diferente criteria cu lo bay evalua.
E maximo di 5 negoshi aki e ora ey lo beneficia di un trayecto otro aña tambe, segun e CEO di ATA.
El a splica cu ATA lo duna guia y entrenamento personaliza na e 5 negoshinan aki, pero tambe lo lanza un campaña di promocion pa e Aruba Signature Experiences bao di nos bishitantenan tambe.
“Tur esaki por dunabo un balor como comerciante te cu 20 mil florin di loke bo por beneficia di nos conocemento, nos canalnan, promocion etc.”, segun Croes.
El a splica cu e intencion no ta pa e program ta disponibel solamente pa e 5 companianan, sino e intencion ta pa mundo comercial y e NGO’s y tur ta conciente di niche development y cua ta e niche-nan na cual kier duna prioridad.
