ORANJESTAD (AAN): Centro di Bario Lago Heights (CBLH) tin e grato placer di anuncia su programa nobo cu lo cuminsa na September bao di nomber di ‘Learning Links’ na San Nicolas.
E Proyecto aki lo core di september 2023 te cu april 2024 y lo consisti di varios tayer cu ta trata diferente disciplina y area di desaroyo, incluyendo: Plantacion, Arte y Expresion, Recreacion Educativo pa Famia, Cosemento, Arte Culinario Sostenibel, Empoderacion Propio, Talento y Pasion y Resiliencia.
Ademas, lo tin un Grupo di Sosten pa Mayor y lo termina tur luna cu un fiesta di Bario unda lo presenta e resultado di cada tayer y unda lo celebra tambe nos dushi San Nicolas. ‘Learning Links’ ta worde presenta conhuntamente cu Fundacionnan, Profesionalnan y Comerciantenan y lo enfoca riba aspectonan util cu participantenan lo por aplica mes ora den nan bida diario.
A crea ‘Learning Links’ pa yuda hoben, famia y tambe nos mayornan adulto (60+) pa uni, siña hunto y sostene otro den un ambiente sano. Ta un hecho, cu ora mayoria ciudadano di un pais experencia crecemento personal, facilmente comunidad tambe lo progresa. ‘Learning Links’ lo brinda grandi y chikito chens pa cultiva e sentimento di por siña cos nobo, di sinti nan mes capas, balora y aprecia. Lo combina charla y participacion activo pa brinda un miho experiencia y crecemento riba tereno social, emocional of recreaccional. Si logra aumenta e potencial di participantenan y tambe fortalece e union, of ‘link’, entre individuonan cu e proyecto aki, ‘Learning Links’ lo ta worde considera exitoso. Pueblo ta keda invita pa registra pa e proyecto aki p’asina hunto nos descubri talento y habilidadnan nobo.
CBLH kier recorda Pueblo di su otro actividadnan akinan na San Nicolas, entre otro ‘Scol di Percusion di CBLH’ cu Sr. Vio Wester y grupo ‘Forever Young’ pa adulto mayor y ademas lo sigui brinda comunidad su servicio di facilidad pa reunion y celebracion. Recientemente a inicia colaboracion cu 2 artista cu ta Señora Indra Stamper y Señora Tracy Halman cu lo start lesnan di cosemento pa hoben y tambe les di Foam-Art pa adulto mayor. Tipico ‘Grupo Tramus’ tambe a uni forsa cu CBLH y lo toca tur fin di luna durante e fiesta di bario. Asociacion ‘Aruba Flight Simulator Club’ recientemente tambe a cera acuerdo cu CBLH y lo organiza su famoso exposicion pa tur amante di Aviacion durante luna di september na CBLH.
CBLH ta gradici tur esnan envolvi den e proyecto aki, en particular CEDE Aruba y ‘Samenwerkende Fondsen Cariben’ pa nan sosten inmenso. Mas cu claro CBLH ta extende un invitacion grandi na tur instancia cu ainda lo kier yuda aporta na nos proyecto y tambe tur boluntario eyfo. Pa registracion y mas informacion por tuma contacto libremente cu Shalinie Flores.
