ORANJESTAD (AAN): Desde 2023, e Departamento di Agricultura, Cria y Pesca - Santa Rosa ta colaborando
cu e Universidad di Aruba y e Universidad di Utrecht den un serie di investigacionnan, cu e proposito di fortalese solucionnan y desaroya strategianan pa contribui na e seguridat alimentario di Aruba.
E mainta aki, nos tabata honra pa ricibi e 5o publicacion, cual ta contene e resultadonan di e diferente trabaonan di investigacion cu a surgi for di e programa. E booklet a wordo presenta pa Sr. Eric Mijts, Dean di e programa SISSTEM na Universidad di Aruba y Coordinator di e University of Aruba Research Center.
Señora Nathalie Maduro, Director, y Sr. Facundo Franken, Head Researcher di e Departamento, tabata parti di e teamnan di mentoring cu a guia y apoya e diferente gruponan cu tabata trahando riba e topiconan importante aki.
Santa Rosa ta sumamente orguyoso y agradecido pa e oportunidad pa a contribui na y presenta topiconan di investigacion cu ta di gran importancia pa futuro di seguridat alimentario na Aruba, y pa mira e resultadonan di e trabaonan aki wordo presenta den publicacionnan asina valioso.
Nan ta mira padilanti pa sigui cu e colaboracion importante aki y pa transforma investigacion den solucionnan practico pa un Aruba mas resiliente y cu mas seguridad alimentario.
