ORANJESTAD (AAN): Diamars, 24 di maart 2026, di 6.30-9.00 p.m. lo tin un actividad cultural den cuadro di “Celebracion di nos Identidad pa Recorda, Reconoce y Conmemora” na Biblioteca Nacional Aruba, George Madurostraat 13, Oranjestad.
Ta un anochi special cu un programa excepcional presenta pa e proyecto ‘E Testigo Silencioso’ di Fundacion Museo Arubano, Astrid Britten di Biblioteca Nacional di Aruba, Departamento di Cultura Aruba y Gestor Cultural Mirto Laclé.
Un anochi multidisciplinario cu presentacion di charla, documental, declamacion, musica y canto pa ‘Recorda, Reconoce y Conmemora’.
Como invitado special lo ta presente for di Hulanda, antropologo drs. Maria Karg cu lo duna un charla encuanto su obra literario Stil Verleden.
Lo duna reconocemento na Maybelline Arends-Croes pa 50 aña y mas di su trayectoria y trabou promoviendo cultura y folklore di Aruba a traves di musica, canto y tambe documentacion di musica pa e futuro generacionnan di Aruba.
Lo duna reconecemento na dr. Wim Rutgers cu a haci diferente investigacion di literatura y a establece e fundeshi pa Literatura di Caribe.
Dr. Wim Rutgers lo ricibi e premio pa literatura “Premio Literario Ernesto E. Rosenstand- 2026”.
Lo celebra Dia Internacional di Poesia cu declamacion di ganadornan di Poeta Patria, Marilis Becker y Aurelia Croes.
Lo reconoce baluarte, Maybelline Arends-Croes pa su trabou inmenso pa cultura musical di Aruba, pa interpretacion y celebracion di e Himno di Aruba, Aruba dushi tera, cu e aña aki ta celebra 50 aña.
Baluarte dr. Wim Rutgers ta ricibi reconocemento pa un trabou di investigacion y documentacion di literatura di Aruba, Boneiro, Corsou, Surinam y mas. Esaki pa mas di 50 aña.
Gruponan musical bou di guia di Maybelline Arends-Croes, ‘The Young Voices’ y ‘MascuVox’ (voznan masculino) hunto cu un solista lo ta presente pa deleita publico cu nan canto. E musiconan Pepe Gonzales, Max Hassel, Jorzinho Schlipken y Johnny Scharbaay lo acompaña e cantantenan.
Drs. Mirto Laclé lo duna un introduccion di ‘Celebracion di nos Identidad’.
Bin celebra hunto cu Biblioteca Nacional Aruba. Entrada ta gratis.
Pa informacion adicional por tuma contacto cu co-organisado Mirto Laclé, 7426274.
